AQShda koronavirusga qarshi emlash boshlandi

AQShda 14-dekabr kuni koronavirusga qarshi emlash boshlandi, ba’zi shtatlarda esa bu jarayon 15-dekabrdan boshlanadi. Pfizer va BioNTech kompaniyalari tomonidan yaratilgan vaksinaning dastlabki dozalari dam olish kunlari butun mamlakat bo‘ylab tarqatilgan. Bu haqda “RIA Novosti” xabar berdi.

Vaksina yaratish, ishlab chiqish va tarqatish bo‘yicha xususiy-davlat dasturi vakili Gustave Pernaning ma’lum qilishicha, 14-dekabr kuni vaksina 50 ta shtatdagi 145 ta joyga yetkazib beriladi. 15-dekabr kuni yana 425 ta, 16-dekabr kuni esa 66 ta joyga vaksinani yetkazib berish rejalashtirilgan.

Har bir shtatning rasmiylari emlashni kimdan boshlashni belgilash huquqiga ega, biroq avvalroq Kasalliklarni nazorat qilish va oldini olish boshqarmasi birinchi navbatda tibbiyot muassasalari xodimlari, qariyalar uylari va shu kabi ijtimoiy muassasalardagi odamlarni emlash haqida tavsiya bergan.

OAV 13-dekabr kuni o‘z manbalariga tayanib, dastlab AQShda davlat rahbariyati va hokimiyat organlari vakillari 14-dekabrdan boshlab emlanishi haqida xabar bergan. Biroq mamlakat prezidenti Donald Tramp Oq uy xodimlari emlashni keyinroq olishi haqida ma’lum qilgan va bu haqda ko‘rsatma berganini aytib o‘tgan.

Trampning o‘zi ham ayni paytda emlash olishni rejalashtirmayapti, biroq bu ishni keyinroq amalga oshirishni mo‘ljallagan. Donald Tramp oktabr oyida koronavirus bilan kasallangandi va unda antitanachalar shakllangan.

Dori vositalari yetkazib berish bilan shug‘ullanuvchi UPS kompaniyasi bo‘linmasining rahbari Ues Uilerning so‘zlariga ko‘ra, vaksina ortilgan barcha reyslar 13-dekabr kuni o‘z manziliga uchib ketgan.

Vaksinani yetkazib berishdagi qiyinchiliklardan biri doimiy haroratni ushlab turish hisoblanadi — vaksina Selsiy shkalasi bo‘yicha 75 daraja sovuqda saqlanishi kerak. Buning uchun quruq muzdan foydalanilmoqda.

CNN tomonidan xabar berilishicha, 13-dekabr kuni ishlab chiqarish nuqtalaridan taxminan 920 mingta doza jo‘natilgan. Yana 2 millionta dozani 14-dekabr kuni jo‘natish rejalashtirilgan, ular o‘z manziliga 15-dekabr kuni yetib borishi kerak.

AQShda 2020-yil yakuniga qadar taxminan 20 million kishini koronavirusga qarshi emlash rejalashtirilmoqda. 2021-yilning dastlabki ikki oyida esa bu raqam 100 million kishiga yetishi kerak.

Moderna kompaniyasi ham o‘z vaksinasini litsenziyalash uchun ariza bergan.