Pashinyan Qorabog‘da halok bo‘lganlar xotirasiga uch kunlik motam e’lon qildi

19-dekabrdan Armanistonda Tog‘li Qorabog‘dagi jangovar harakatlar chog‘ida halok bo‘lganlar xotirasiga uch kunlik umummilliy motam e’lon qilinadi. Bu haqda mamlakat bosh vaziri Nikol Pashinyan xalqqa murojaatida ma’lum qildi, deb yozadi “RBK”.

“Ehtimol, 19-dekabr holati bo‘yicha qurbon bo‘lgan harbiylarimizning barcha jasadlari topilmas, ko‘plab shaxsi noma’lum jasadlar bo‘lar. Lekin bunday davlat qarorini boshqa kechiktirmaslik kerak deb hisoblayman”, — dedi Pashinyan.

Motam marosimlari chog‘ida Yerevanda Respublika maydonidan “Yeralbur” qabristonigacha tantanali yurish tashkil qilinadi.

Bosh vazir eslatishicha, 19-dekabr kuni Tog‘li Qorabog‘dagi janglar tugaganiga 40 kun to‘ladi. Uning ta’kidlashicha, halok bo‘lganlarning jasadlarini qidirish va ularning shaxsini aniqlash ishlari davom ettiriladi.

Dastlabki ma’lumotlarga ko‘ra, Ozarbayjon bilan qurolli nizolar chog‘ida 27-sentabrdan 9-noyabrga qadar Armaniston tomondan 3,3 mingdan ortiq harbiy xizmatchi halok bo‘lgan va bedarak yo‘qolgan. Ozarbayjon Mudofaa vazirligi ma’lumotlariga ko‘ra, janglarda qariyb 2,8 ming harbiy xizmatchi halok bo‘lgan. 1,2 mingdan ortig‘i yaralangan va gospitallarda davolanmoqda, yana yuzga yaqin harbiy bedarak yo‘qolgan deb hisoblanadi.

Nikol Pashinyan xalqqa qaratilgan murojaatida, shuningdek, saylov o‘tkazilmasidan turib hukumat rahbari lavozimidan ketmasligini ma’lum qildi. U Rossiya va Ozarbayjon prezidentlari bilan birgalikda Tog‘li Qorabog‘da urushni to‘xtatish haqida bayonot imzolagani uchun muxolifat uning iste’fosini talab qilmoqda.

“Menga xalq tomonidan berilgan maqomdan faqat xalq xohish-istagining ishonchli natijalari asosidagina bosh tortishim mumkin. Hozircha bunday xohish-istak yo‘q ekan, bosh vazir vazifalarini bajarishda davom etaman”, — dedi Pashinyan.

Eslatib o‘tamiz, 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi. Shundan so‘ng Armanistonda ushbu bitim sabab norozilik namoyishlari boshlandi va u ikki haftadan buyon davom etmoqda. Bitimga ko‘ra, Ozarbayjon mintaqa hududining katta qismini olgan. Muxolifat Pashinyan “xoinlik” shartnomasi imzolangani sababli iste’foga chiqishini talab qilmoqda.

Avvalroq Armaniston Ozarbayjon qurolli kuchlari tomonidan Tog‘li Qorabog‘da hujum boshlaganini e’lon qilgan edi. Rossiya Mudofaa vazirligi sulh buzilganligini tasdiqladi.