Svazilend (Esvatini) qirolligining bosh vaziri Mandvulo Ambroze Dlamini 53 yoshida COVID-19 bilan kasallanganidan so‘ng Janubiy Afrikadagi kasalxonada vafot etdi, deb xabar qildi Daily Mail.
Siyosatchiga noyabr oyi o‘rtalarida koronavirus tashxisi qo‘yilgan. 16-noyabr kuni u test musbat natija ko‘rsatganini e’lon qildi. Keyin u o‘zini yaxshi his qilayotganini ma’lum qildi.
Biroq dekabr oyi boshida uning sog‘lig‘i keskin yomonlashdi va sog‘ayishini tezlashtirish maqsadida qo‘shni mamlakatdagi kasalxonaga yotqizildi. Dlamini kasalxonaga yotqizilganidan ikki hafta o‘tgach vafot etdi. Svazilend qiroli Msvati III siyosatchi vafoti munosabati bilan hamdardlik bildirdi.
Svazilend – Afrikaning janubidagi dengizga chiqish imkoniyati yo‘q kichik mamlakat. U dunyodagi eng so‘nggi mutlaq monarxiyalardan biridir.
Avvalroq Moldova bosh vaziri, kichik Donald Tramp va Ukraina sog‘liqni saqlash vaziri COVID-19’ga chalingani haqida xabar berilgandi.
Izoh (0)