AQShda koronavirusga qarshi emlashning birinchi bosqichi bo‘yicha rejalar ma’lum qilindi
Amerikaning Pfizer va Germaniyaning BioNTech kompaniyalari tomonidan hamkorlikda ishlab chiqarilgan vaksinaning ilk partiyalari AQSh vaksinatsiya markazlariga 14-dekabr, dushanba kuni yetkazib berilishni boshlaydi. Bu haqda Warp Speed vaksinatsiya dasturi rahbari general Gustav Perna ma’lum qildi, deb yozadi “RBK”.
Pernaning so‘zlariga ko‘ra, ayni paytda ishlab chiqaruvchi dorini qadoqlamoqda, keyingi bir kecha-kunduz mobaynida u pochta bo‘linmalariga yetkaziladi, ular esa o‘z navbatida, butun mamlakat bo‘ylab 636 ta vaksinatsiya markaziga yetkazib beradi.
Bunday markazlarning 145 tasi vaksinaning birinchi partiyalarini 14-dekabr, dushanba kuniyoq qabul qilib oladi. Qolganlariga esa chorshanba kunigacha yetkaziladi. Kasalliklar nazorati va profilaktikasi markazlari (CDC) hisob-kitoblariga ko‘ra, vaksinatsiyaning birinchi haftasida markazlarga 2,9 million doza dori taqsimlanadi. 2020-yil oxirigacha Amerika hukumati 40 million kishini emlashni rejalashtirmoqda.
Joylardagi vaksinatsiya uchun shtatlar hukumatlari va mahalliy sog‘liqni saqlash departamentlari mas’ul bo‘ladi. Birinchi navbatda tibbiyot xodimlari, shuningdek, bemorlar va keksalarni parvarish qilish muassasalari xodimlari emlanishi kutilmoqda.
12-dekabr kuni AQSh Oziq-ovqat mahsulotlari va dori vositalarini nazorat qilish boshqarmasi (FDA) Pfizer va BioNTech kompaniyalari tomonidan yaratilgan koronavirusga qarshi vaksinalardan foydalanishga ruxsat berdi.
AQSh prezidenti Donald Trampning ma’lum qilishicha, vaksinaning birinchi dozasini yuborish ishlari “24 soatdan kamroq vaqt ichida” amalga oshiriladi.
Amerikaning Pfizer farmatsevtik giganti bilan birga COVID-19’ga qarshi vaksina yaratgan Germaniyaning BioNTech bioinjiniring kompaniyasi rahbari Ugur Shahin AQShda vaksinatsiya jarayoni normal kechgan holda, 2021-yil yozi oxiriga kelib, koronavirus infeksiyasi pandemiyasini nazorat ostiga olishga muvaffaq bo‘lish mumkinligi haqida aytib o‘tdi.
So‘nggi ma’lumotlarga ko‘ra, AQShda pandemiya boshidan buyon 16 020 646 kishi koronavirusga chalingan, 297 575 kishi kasallikdan vafot etgan.
