Polsha poytaxti Varshavada aholi 13-dekabr, yakshanba kuni hukumatga qarshi ommaviy namoyishga chiqdi, deb yozadi “TASS”. Ular mamlakatdagi hukmron “Qonun va adolat” partiyasi (PiS) siyosatiga qarshi chiqmoqda.
Odamlar Varshavaning markaziy ko‘chalarini to‘sib qo‘ydi. Namoyishda Polsha Tadbirkorlar kengashi vakillari ham qatnashmoqda, ular hukumatning sohadagi koronavirus tarqalishiga qarshi siyosatidan norozi, shu tufayli iqtisodiyotning ko‘plab tarmoqlari jabr ko‘rdi, deb hisoblamoqda ular.
Bir necha ming kishi namoyishga Polsha bayroqlari va “Yetar!”, “Erkinlik va tenglik”, “Mening tanlovim — gunoh emas”, “Sizlar firmalarni buzyapsiz”, “Norozilikka haqlimiz”, “Men tanlov tarafdoriman” shiorlari yozilgan taxtalar bilan keldi.
Aksiya ayollar norozilik harakati tomonidan tashkil qilindi, u 22-oktabrda Konstitutsiyaviy sud tomonidan patologiya sababli homilani oldirish mamlakat bosh qonuniga zid ekanligi haqida qaror qabul qilinganidan keyin ommaviy namoyishlar o‘tkazishni boshlagan edi.
Ushbu sud qarori “Rasmiy axborotnoma”da e’lon qilinganidan keyin kuchga kiradi. Bu qachon yuz berishi noma’lum, chunki hukumat chop etishni keyinga qoldirishga qaror qildi. Agar qaror rasman e’lon qilinsa, o‘sha vaqtdan boshlab mamlakatda homilani oldirish uchun rasman ruxsat beriladigan ikkita sabab qolishi mumkin, bular — onaning hayoti va salomatligiga nisbatan xavf hamda zo‘rlash oqibatidagi homiladorlik.
Sud qaroridan keyin yuz minglab odamlar ishtirokidagi norozilik namoyishlari ikki hafta davomida deyarli har kuni Polshaning 400 dan ortiq shaharlarida bo‘lib o‘tdi. Namoyishlar tashkilotchilari hukumatning iste’fosini va Yaroslav Kachinskiyning “Qonun va adolat” hukmron partiyasi ketishini talab qilmoqda. Hukumat namoyishlar ishtirokchilarini koronavirus tarqalishiga imkoniyat yaratmaslik uchun o‘z faoliyatini to‘xtatishga chaqirmoqda.
22-oktabrda Polsha Konstitutsiyaviy sudi mamlakatda homila patologiyasi tufayli abort qilishga ruxsat berilganini asosiy qonunga zid deb topgandi. Konstitutsiyaviy sudning ushbu qarori abort qilishni deyarli butunlay taqiqlaydi. Ommaviy norozilik namoyishlari boshlangandan so‘ng Polsha prezidenti Anjey Duda qonunga tuzatishlar kiritilishini aytdi, unga ko‘ra bolada o‘limga olib keladigan patologiyalar bo‘lsa, abort qilishga ruxsat etiladi.
Izoh (0)