Tibbiyot muassasalarida suv ta’minoti yo‘qligi tufayli 1,8 milliard kishi COVID-19 va boshqa yuqumli kasalliklar bilan kasallanishi mumkin. Bu haqda Jahon sog‘liqni saqlash tashkiloti va BMTning Bolalar jamg‘armasi (UNISEF) hisobotida keltirilgan.
Tashkilot ma’lumotlariga ko‘ra, har to‘rtinchi tibbiyot muassasasida suv ta’minoti tizimi, har uchinchisida esa qo‘llar uchun zarur gigiyena vositalari mavjud emas.
“Tibbiy muassasada hamshira va shifokorlarning suvsiz, sanitariya va gigiyenasiz ishlashi shaxsiy himoya vositalarisiz ishlash bilan tengdir”, — degan JSST rahbari Tedros Gebreyesus.
U koronavirusga qarshi kurashda suv ta’minoti, sanitariya va gigiyena muhim ahamiyatga ega ekanligini ta’kidlab, “bu borada hali ham jiddiy bo‘shliqlar borligi”ni qo‘shimcha qilgan.
Bu vaziyat dunyoning eng kam rivojlangan 47 davlatida, ayniqsa, ayanchli ekanligini, tibbiyot muassasalarida suv ta’minotini yaxshilash uchun ushbu mamlakat fuqarolarining har biriga 1 dollar miqdorida investitsiya zarurligini bildirgan. Kasalxona va klinikalarda gigiyenani yaxshilash uchun mablag‘ kiritish sog‘liqni saqlash tizimi xarajatlarini kamaytirishga, tibbiyot xodimlarining suv qidirish uchun ketkazadigan vaqtini qisqartirishga, shuningdek, aholining zaif qatlami, homilador ayollar va bolalar uchun ko‘rsatiladigan xizmat sifatini sezilarli darajada oshirishga yordam beradi.
Virus tarqalishini real vaqt rejimida kuzatib kelayotgan Jons Hopkins universiteti ma’lumotiga ko‘ra, ayni paytda dunyoda koronavirusga chalinganlar soni 72 million kishidan oshgan.
Izoh (0)