Abdumalik Halakov: “O‘zbekiston chempionati — biz uchun eng qiyin musobaqa, bu yerdagilardan chetdagi raqiblar yengilroq”

Boks bo‘yicha -60 kg vazn toifasida 2020-yilgi O‘zbekiston chempionati g‘olibi Abdumalik Halakov musobaqadan keyingi fikrlari bilan o‘rtoqlashdi.

Taassurotlar a’lo darajada. Aslida bu musobaqada qatnashmasligim kerak edi, shifokorlar ruxsat bermayotgandi. Sababi, Andijondagi musobaqada raqib bilan boshlarimiz to‘qnashib ketganida qoshim yorilgandi. Biroq ota-onam va murabbiylarimning daldasi menga yordam berdi.

Finaldagi raqibim (Shunqor Abdurasulov) juda kuchli edi, u Uzbek Tigers’dagi va Osiyo o‘yinlarida ishtiroki bilan mashhur. Shu o‘ringa raqibimga ham rahmat aytaman, unga qarshi kurash men uchun baxt, biz ulardan o‘rnak olamiz.

Eng esda qolarli jang sifatida shubhasiz, finalni aytaman. Bu ikkinchi bor finalga chiqishim edi, jangda yutqazishim mumkin emas edi. Sababi ota-onam meni kuzatib turgandi, hozir ham onam televizor qarshisida yig‘lab o‘tirgan bo‘lsa kerak.

O‘tgan yilgi chempionlik bilan bu yilgi g‘oliblikning farqi haqida gapirsam, o‘tgan yilgi chempionlikni ham o‘ziga xos o‘rni bor. Biroq bu yilgi chempionat umuman boshqacha bo‘ldi. Raqiblar juda kuchli, o‘tgan yili bu kabi kuchli raqiblar bo‘lmagandi. Ko‘rganingizdek Osiyo va Jahon chempionatlari ishtirokchilari qatnashdi.

O‘zbekiston chempionati biz uchun Jahon chempionatidek o‘tadi. Bu yerda g‘alaba qozonsak chet eldagi raqiblar biz uchun yengil bo‘ladi. O‘zbekiston chempionati — biz uchun eng qiyin va hayajonli musobaqa.

Abdumalik Halakov, bokschi