Абдумалик Ҳалаков: «Ўзбекистон чемпионати — биз учун энг қийин мусобақа, бу ердагилардан четдаги рақиблар енгилроқ»

Бокс бўйича -60 кг вазн тоифасида 2020 йилги Ўзбекистон чемпионати ғолиби Абдумалик Ҳалаков мусобақадан кейинги фикрлари билан ўртоқлашди.

Таассуротлар аъло даражада. Аслида бу мусобақада қатнашмаслигим керак эди, шифокорлар рухсат бермаётганди. Сабаби, Андижондаги мусобақада рақиб билан бошларимиз тўқнашиб кетганида қошим ёрилганди. Бироқ ота-онам ва мураббийларимнинг далдаси менга ёрдам берди.

Финалдаги рақибим (Шунқор Абдурасулов) жуда кучли эди, у Узбек Тигерсъдаги ва Осиё ўйинларида иштироки билан машҳур. Шу ўринга рақибимга ҳам раҳмат айтаман, унга қарши кураш мен учун бахт, биз улардан ўрнак оламиз.

Энг эсда қоларли жанг сифатида шубҳасиз, финални айтаман. Бу иккинчи бор финалга чиқишим эди, жангда ютқазишим мумкин эмас эди. Сабаби ота-онам мени кузатиб турганди, ҳозир ҳам онам телевизор қаршисида йиғлаб ўтирган бўлса керак.

Ўтган йилги чемпионлик билан бу йилги ғолибликнинг фарқи ҳақида гапирсам, ўтган йилги чемпионликни ҳам ўзига хос ўрни бор. Бироқ бу йилги чемпионат умуман бошқача бўлди. Рақиблар жуда кучли, ўтган йили бу каби кучли рақиблар бўлмаганди. Кўрганингиздек Осиё ва Жаҳон чемпионатлари иштирокчилари қатнашди.

Ўзбекистон чемпионати биз учун Жаҳон чемпионатидек ўтади. Бу ерда ғалаба қозонсак чет элдаги рақиблар биз учун енгил бўлади. Ўзбекистон чемпионати — биз учун энг қийин ва ҳаяжонли мусобақа.

Абдумалик Ҳалаков, боксчи