Trampning ovozlarni sanashni to‘xtatish haqidagi da’volarini ikkita shtat sudi rad etdi

AQShning ikkita shtatidagi sudlar amaldagi AQSh prezidenti Donald Trampning davlat rahbari saylovlaridagi ovozlarni hisoblash yuzasidan bergan da’volarini rad etdi, deb yozadi “RBK”.

Xususan, Tramp saylovoldi shtabining da’vosini Jorjiya shtatidagi Chatem okrugi sudi rad etdi. Shtab arizasida yozilishicha, ushbu shtatda saylovlardan keyin qabul qilingan byulletenlar to‘g‘ri saqlanmagan va o‘z vaqtida kelgan byulletenlar bilan aralashib ketgan bo‘lishi mumkin.

Shu munosabat bilan shtab ovozlarni hisoblashni to‘xtatishni talab qilgan, ammo sud Chatem saylov komissiyasi xatti-harakatlarida qonun buzilishi holatlarini topmagan.

Tramp saylovoldi shtabining da’vosi Michiganda ham rad etildi. Shtab kuzatuvchilar ovozlarni sanash joylariga yetarli darajada qo‘yilmaganini aytib, bu muammo hal etilmagunicha jarayonni to‘xtatib turishni talab qildi. Shuningdek, shtab allaqachon hisoblab chiqilgan byulletenlar qaytadan ko‘rib chiqilishini so‘radi. Ammo bu da’vo ham rad etildi.

Ovozlarni sanashni to‘xtatishni Trampning shtabi Filadelfiyada — prezident saylovlarida asosiylaridan biri bo‘lgan Pensilvaniya shtatidagi eng yirik shaharda ham talab qildi. Respublikachilar o‘z kuzatuvchilariga byulletenlar ko‘rib chiqilayotgan stollarga yaqinroq borish imkonini beruvchi sud orderini olishga muvaffaq bo‘ldi va kichik tanaffusdan keyin ovozlarni hisoblash davom etdi.

AQSh prezidenti saylovlari 3-noyabr kuni bo‘lib o‘tdi. Bu yil rekord sonli amerikaliklar pochta orqali ovoz berdi, shu sababli ko‘plab shtatlarda ovozlarni hisoblash jarayoni uzoqroq davom etmoqda.

Tramp saylov uchastkalari yopilib bo‘lganidan keyin kelgan byulletenlar (pochta orqali) hisobga olinmasligini talab qilmoqda. Ayni paytda uning raqibi, AQSh sobiq vitse-prezidenti Jo Bayden “har bitta ovoz hisobga olinishi shart”ligini ta’kidlamoqda.