Bayden saylovlar natijasini kutayotgan amerikaliklarni tinchlik saqlashga chaqirdi

Demokratlar partiyasidan AQSh prezidentligiga nomzod Jo Bayden ovoz berish natijalarini xotirjam kutishga chaqirdi, deb xabar beradi “Kommersant”.

“Barchadan xotirjam bo‘lishni so‘rayman. Jarayon ishlayapti. Hisob-kitoblar yakunlanmoqda va tez orada ovoz berish jarayonlari natijasini bilamiz”, — deydi Bayden Uilmington shahridagi chiqishida.

U yana bir bor o‘zining g‘alabasiga ishonishini ta’kidlab o‘tgan: “Ovozlar hisob-kitobi yakunlangach, shubhasiz, senator Xarris va meni g‘olib deb e’lon qilishadi”. Eslatib o‘tamiz, avvalroq ham Bayden o‘zining g‘alabasiga ishonishini va prezidentlik lavozimidagi birinchi ish kunidanoq AQShni iqlim bo‘yicha Parij bitimiga qaytarishga tayyor ekanligini bildirgan.

AQShda prezidentlik saylovlari 3-noyabr kuni boshlangan bo‘lib, ovozlar hisob-kitobi hamon davom etmoqda. Bayden g‘alabasi uchun saylovchilarning 17 ta ovozi yetmayapti, AQShning amaldagi prezidenti Donald Trampga esa 56 ta ovoz kerak.

Avvalroq Donald Tramp AQSh prezidentligi saylovida berilgan ovozlarni sanashni to‘xtatishga chaqirgan edi. Tramp saylov uchastkalari yopilganidan keyin kelib tushgan byulletenlarni sanash kerak emasligini talab qilmoqda.