YeXHT Trampning AQSh prezidenti saylovlaridagi qoidabuzarliklar haqidagi gaplarini asossiz deb topdi

Amaldagi AQSh prezidenti Donald Trampning Amerika prezidenti saylovlari chog‘ida qoidabuzarliklar yuz bergani haqidagi gaplari asossiz hamda aholining demokratik institutlarga nisbatan ishonchini poymol qiladi. Bu haqda Yevropada xavfsizlik va hamkorlik tashkilotining AQSh prezidenti saylovlaridagi kuzatuv missiyasi rahbari bayonotida aytiladi, deb yozadi “RBK”.

“Tizimli qoida buzilishlari haqidagi asossiz ayblovlar, ayniqsa, amaldagi AQSh prezidenti tomonidan, shu jumladan, saylov kuni bo‘lgan ayblovlar jamoatchilikning demokratik institutlarga ishonchini poymol qiladi”, — deyiladi bayonotda.

YeXHT qayd etishicha, tashkilotchilar ko‘p sonli jalb etilgan fuqarolar ko‘magida “hayratlanarli darajada imkoniyatlarini ishga solgan”, bu aholiga “yuridik va texnik muammolarga, shuningdek, amaldagi prezidentning saylov jarayoniga nisbatan ishonchni susaytirishga qaratilgan urinishlariga qaramasdan, o‘z tanlovini amalga oshirish imkoniyatini bergan”.

Tashkilotda “COVID-19 va pochta orqali ovoz berish amaliyotining kengayishi bahonasida qonuniy taqdim etilgan byulletenlar hisob-kitobini cheklashga bo‘lgan urinishlar” yuzasidan xavotir bildirdi.

Shuningdek, tashkilotda AQSh saylov huquqlarini ta’minlash bo‘yicha katta ishlarni amalga oshirganiga qaramay, umumiy ovoz berish tizimi yuzasidan tashvishda qolmoqda. “Ayollarning siyosiy hayotdagi ishtiroki ham ko‘paygan, ammo bu muammoga ko‘proq e’tibor qaratilishi kerak”, — deya aniqlik kiritishdi YeXHTda.

Avvalroq Donald Tramp o‘z Twitter’ida Pensilvaniya, Viskonsin va Michiganda demokratlar prezident saylovlarida berilgan ovozlar bo‘yicha nayranglar uyushtirishga uringanini aytgandi.

Avvalroq Tramp muhim ahamiyatga ega to‘rtta shtatda g‘alaba qozonganini e’lon qilgan edi. Bular Michigan, Pensilvaniya, Jorjiya va Shimoliy Karolina.