Avstriya kontrrazvedkasi Venada to‘rt kishini o‘ldirgan terrorchining avvalroq Slovakiyada noqonuniy o‘q-dori sotib olishga uringanidan xabardor bo‘lgan. Bu haqda 5-noyabr kuni Avstriya ichki ishlar vaziri Karl Nexammer ma’lum qildi, deb yozmoqda “Korrespondent.net”.
Vazirning so‘zlariga ko‘ra, keyinroq Kuytim Feyzulay ekanligi ma’lum bo‘lgan jinoyatchi o‘q-dori izlab Slovakiyaga borgan, biroq uning qurol ishlatish uchun litsenziyasi bo‘lmagani sababli rad javobini olgan.
Nexammerning qayd etishicha, bu ma’lumot Avstriya kontrrazvedkasiga ma’lum bo‘lgan, biroq prokurorlarga yetkazilmagan. U o‘zidan avvalgi vazir Gerbert Kiklni kontrrazvedka xizmatiga zarar yetkazganlikda ayblagan.
Shuningdek, vazirning ta’kidlashicha, avvalroq bo‘lajak terrorchi ekstremizmda gumonlanib, Turkiyada qo‘lga olingan va Avstriyaga deportatsiya qilingan.
Feyzulay 22 oylik qamoq jazosiga hukm qilinganiga qaramasdan, 11 oydan keyin sinov muddati bilan ozod qilingan.
Eslatib o‘tamiz, 2-noyabr oqshomida sodir bo‘lgan Venadagi teraktda to‘rt kishi halok bo‘lgan, 22 kishi turli darajada jarohat olgan. Dastlab politsiya hujum uyushtirganlardan birini otib o‘ldirgani haqida xabar qilgan. U 20 yoshli Feyzulay Kuytim bo‘lib, Suriyaga ketib, IShID terrorchilariga qo‘shilmoqchi bo‘lgani uchun 22 oylik qamoq jazosiga hukm qilingan biroq, muddatidan ilgari shartli ozod qilingan. IShID ushbu terakt uchun mas’uliyatni o‘z zimmasiga olgan.
Izoh (0)