Трампнинг овозларни санашни тўхтатиш ҳақидаги даъволарини иккита штат суди рад этди

АҚШнинг иккита штатидаги судлар амалдаги АҚШ президенти Дональд Трампнинг давлат раҳбари сайловларидаги овозларни ҳисоблаш юзасидан берган даъволарини рад этди, деб ёзади «РБК».

Хусусан, Трамп сайловолди штабининг даъвосини Жоржия штатидаги Чатем округи суди рад этди. Штаб аризасида ёзилишича, ушбу штатда сайловлардан кейин қабул қилинган бюллетенлар тўғри сақланмаган ва ўз вақтида келган бюллетенлар билан аралашиб кетган бўлиши мумкин.

Шу муносабат билан штаб овозларни ҳисоблашни тўхтатишни талаб қилган, аммо суд Чатем сайлов комиссияси хатти-ҳаракатларида қонун бузилиши ҳолатларини топмаган.

Трамп сайловолди штабининг даъвоси Мичиганда ҳам рад этилди. Штаб кузатувчилар овозларни санаш жойларига етарли даражада қўйилмаганини айтиб, бу муаммо ҳал этилмагунича жараённи тўхтатиб туришни талаб қилди. Шунингдек, штаб аллақачон ҳисоблаб чиқилган бюллетенлар қайтадан кўриб чиқилишини сўради. Аммо бу даъво ҳам рад этилди.

Овозларни санашни тўхтатишни Трампнинг штаби Филадельфияда — президент сайловларида асосийларидан бири бўлган Пенсильвания штатидаги энг йирик шаҳарда ҳам талаб қилди. Республикачилар ўз кузатувчиларига бюллетенлар кўриб чиқилаётган столларга яқинроқ бориш имконини берувчи суд ордерини олишга муваффақ бўлди ва кичик танаффусдан кейин овозларни ҳисоблаш давом этди.

АҚШ президенти сайловлари 3 ноябрь куни бўлиб ўтди. Бу йил рекорд сонли америкаликлар почта орқали овоз берди, шу сабабли кўплаб штатларда овозларни ҳисоблаш жараёни узоқроқ давом этмоқда.

Трамп сайлов участкалари ёпилиб бўлганидан кейин келган бюллетенлар (почта орқали) ҳисобга олинмаслигини талаб қилмоқда. Айни пайтда унинг рақиби, АҚШ собиқ вице-президенти Жо Байден «ҳар битта овоз ҳисобга олиниши шарт»лигини таъкидламоқда.