Belarus prezidenti Aleksandr Lukashenkoning ma’lum qilishicha, 9-avgustdagi saylovdan keyin Svetlana Tixanovskayaning o‘zi uni mamlakatdan chiqarib yuborishni so‘ragan. Lukashenkoning so‘zlariga ko‘ra, Tixanovskaya Litvaga jo‘natilgan va yashashi uchun 15 ming dollar berilgan. Prezidentning chiqishi uning matbuot xizmati tomonidan e’lon qilindi, deb yozmoqda Meduza.
Lukashenkoning aytishicha, saylovdan keyin Tixanovskayaning shtabida taxminan 50 nafar xorijlik jurnalist yig‘ilgan. Nomzodning qo‘riqchilari orasida kuch tuzilmalarining sobiq xodimi bo‘lgan. Mazkur xodim jurnalistlarning yig‘ilganini ko‘rib, bu haqda Ichki ishlar vazirligiga xabar bergan. Lukashenko Tixanovskayaning shtabini qo‘riqlash uchun Davlat xavfsizlik qo‘mitasining 120 nafar maxsus bo‘linmasi xodimini jo‘natgan.
“G‘oya Odessadagi kabi bo‘lgan: shtabni yoqib yuborish va hukumatni ayblash”, — deya ma’lum qilgan Lukashenko. Uning so‘zlariga ko‘ra, ertasi kuni Tixanovskaya Ichki ishlar vazirligiga kelgan va uni Belarusdan chiqarib yuborishni so‘ragan.
“Biz qo‘riqlov ostida o‘zi tanlagan odamlar bilan uni Litvaga, bolalari oldiga, chiqarib yubordik. U Litvada yashash uchun puli yo‘qligini aytganda men topshiriq berdim, davlat kompaniyasidan 15 ming dollar oldik va unga berdik. ‘Sizga katta rahmat’, deb yig‘ladi, chiqarib yubordik. Bundan tashqari, men Litvadagi elchixonamizga unga yordam berish haqida ko‘rsatma berdim. Biroq u yerda Litva maxsus xizmatlari tezda uni nazoratga oldi”, — deya ta’kidlagan Belarus prezidenti.
Lukashenko saylovning ertasi kuni, 10-avgustda Davlat xavfsizlik qo‘mitasiga Tixanovskayaning shtabini qo‘riqlash haqida topshiriq berganini ma’lum qilgan. 21-avgust kuni esa Lukashenko Tixanovskayaga uning so‘roviga asosan xorijga chiqishga yordam berilganini aytgan.
Saylovlarni soxtalashtirish haqidagi ma’lumotlar fonida Belarusda ommaviy norozilik namoyishlari boshlandi va haligacha davom etmoqda. Namoyishchilar Lukashenkoni saylovni soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.
Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.
Izoh (0)