Qirg‘iziston Milliy xavfsizlik davlat qo‘mitasi binosida 9-oktabr kuni ertalab Xavfsizlik kengashi kotibi vazifasini vaqtinchalik bajaruvchi Omurbek Suvanaliyev va mamlakat kuch tuzilmalari koordinatori ishtirokida yig‘ilish bo‘lib o‘tdi. Uchrashuv natijasiga ko‘ra, Milliy xavfsizlik davlat qo‘mitasi xodimlari va faxriylari Xavfsizlik kengashi kotibini binodan “haydab chiqarishga” qaror qildi, deb yozmoqda “RBK”.
Yig‘ilishda Milliy xavfsizlik davlat qo‘mitasi rahbariyati, faxriylari va xodimlarining mamlakatdagi vaziyat yuzasidan murojaati o‘qib eshittirilgan. Unda Milliy xavfsizlik davlat qo‘mitasi xodimlari “ayrim siyosiy va boshqa kuchlarning manfaatlariga xizmat qilmasligi va muayyan guruhlarning g‘arazli maqsadlariga erishish uchun siyosiy vosita bo‘lmasligi” aytilgan.
“Shundan kelib chiqib, bugun Milliy xavfsizlik davlat qo‘mitasining rahbariyati, faxriylari va shaxsiy tarkibi Qirg‘iziston Respublikasi Xavfsizlik kengashi kotibi vazifasini bajaruvchi, kuchishlatar va huquqni muhofaza qiluvchi organlar koordinatori, general-mayor Omurbek Suvanaliyevni Milliy xavfsizlik davlat qo'mitasining markaziy binosidan haydab chiqardi”, — deya matbuot xizmatining so‘zlarini keltirmoqda “RBK”.
Oradan ko‘p o‘tmay prezident So‘ronbay Jeenbekovning Milliy xavfsizlik davlat qo‘mitasi rahbari O‘rozbek Opumbayevni iste’foga chiqarish to‘g‘risidagi farmoni e’lon qilingan.
Xuddi shunday holat mamlakat Ichki ishlar vazirligida ham yuz bergan. Uning binosidan vazirlik rahbari vazifasini bajaruvchi Kursan Asanov chiqarib tashlangan. Vazirlik matbuot xizmati IIV mutasaddilari shunga o‘xshash bayonotni qabul qilganliklarini ma’lum qilgan.
“Mamlakatda keskin siyosiy vaziyat vujudga kelgan ushbu oktabr kunlarida kuch tuzilmalari va huquq-tartibot idoralari siyosatdan tashqarida qolishi va muayyan guruhlarning g‘arazli maqsadlariga erishish vositasi bo‘lmasligi kerak. Ichki ishlar vazirligi shaxsiy tarkibi va IIB faxriylari birlashdi, chunki maqsad bitta — mamlakatda tinchlik va barqarorlikni o‘rnatish. Shu sababli Kursan Asanov IIV binosini tark etdi”, — deyiladi matbuot xizmati xabarida. Shu bilan birga, vazirlik saytida IIV binosida Xavfsizlik kengashi kotibi Omurbek Suvanaliyev raisligida yig‘ilish o‘tkazilganligi to‘g‘risida xabar e’lon qilingan.
Hozirda Qirg‘izistonda bir nechta boshqaruv markazlari paydo bo‘lgan. 4-oktabrda bo‘lib o‘tgan parlament saylovlari natijasida yuzaga kelgan norozilik namoyishlaridan so‘ng muxolifatning ikkita muvofiqlashtiruvchi kengashi paydo bo‘ldi. Ulardan biri amaldagi parlamentning tarqatilishini e’lon qildi. Saylov natijalarining o‘zi haqiqiy emas deb topilgan. Prezident bosh vazir va mamlakat hukumatini iste’foga chiqardi, ammo ular o‘z vazifalarini bajarishda davom etmoqda. Parlament 6-oktabr kuni sobiq deputat Sadir Japarovni bosh vazir etib tayinladi, ammo bu qaror hali prezident tomonidan tasdiqlanmagan.
Izoh (0)