Беларусь президенти Александр Лукашенконинг маълум қилишича, 9 августдаги сайловдан кейин Светлана Тихановскаянинг ўзи уни мамлакатдан чиқариб юборишни сўраган. Лукашенконинг сўзларига кўра, Тихановская Литвага жўнатилган ва яшаши учун 15 минг доллар берилган. Президентнинг чиқиши унинг матбуот хизмати томонидан эълон қилинди, деб ёзмоқда Meduza.
Лукашенконинг айтишича, сайловдан кейин Тихановскаянинг штабида тахминан 50 нафар хорижлик журналист йиғилган. Номзоднинг қўриқчилари орасида куч тузилмаларининг собиқ ходими бўлган. Мазкур ходим журналистларнинг йиғилганини кўриб, бу ҳақда Ички ишлар вазирлигига хабар берган. Лукашенко Тихановскаянинг штабини қўриқлаш учун Давлат хавфсизлик қўмитасининг 120 нафар махсус бўлинмаси ходимини жўнатган.
«Ғоя Одессадаги каби бўлган: штабни ёқиб юбориш ва ҳукуматни айблаш», — дея маълум қилган Лукашенко. Унинг сўзларига кўра, эртаси куни Тихановская Ички ишлар вазирлигига келган ва уни Беларусдан чиқариб юборишни сўраган.
«Биз қўриқлов остида ўзи танлаган одамлар билан уни Литвага, болалари олдига, чиқариб юбордик. У Литвада яшаш учун пули йўқлигини айтганда мен топшириқ бердим, давлат компаниясидан 15 минг доллар олдик ва унга бердик. ‘Сизга катта раҳмат’, деб йиғлади, чиқариб юбордик. Бундан ташқари, мен Литвадаги элчихонамизга унга ёрдам бериш ҳақида кўрсатма бердим. Бироқ у ерда Литва махсус хизматлари тезда уни назоратга олди», — дея таъкидлаган Беларусь президенти.
Лукашенко сайловнинг эртаси куни, 10 августда Давлат хавфсизлик қўмитасига Тихановскаянинг штабини қўриқлаш ҳақида топшириқ берганини маълум қилган. 21 август куни эса Лукашенко Тихановскаяга унинг сўровига асосан хорижга чиқишга ёрдам берилганини айтган.
Сайловларни сохталаштириш ҳақидаги маълумотлар фонида Беларусда оммавий норозилик намойишлари бошланди ва ҳалигача давом этмоқда. Намойишчилар Лукашенкони сайловни сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Изоҳ (0)