Qirg‘iziston poytaxti Bishkek shahriga harbiy bo‘linmalar va harbiy texnika kiritilmoqda. Tegishli farmon mamlakat prezidenti So‘ronboy Jeenbekov tomonidan imzolandi, deb yozmoqda Meduza.
Farmonda qayd etilishicha, harbiylar blokpostlar tashkil qilish, qurolli to‘qnashuvlarning oldini olish, tartibni saqlash va tinch aholini himoya qilish bilan shug‘ullanadi.
Bishkekka harbiylar favqulodda holat rejimi doirasida kiritilmoqda. Favqulodda holat rejimi 9-oktabr kuni soat 20:00 dan 21-oktabr soat 08:00 gacha amalda bo‘ladi.
Favqulodda holat rejimi amal qiladigan davrda Qirg‘iziston poytaxti qo‘mondoni vazifasini ichki ishlar vazirining o‘rinbosari Almazbek O‘rozaliyev bajaradi.
Qirg‘iziston Sog‘liqni saqlash vazirligining 9-oktabrdagi ma’lumotlariga ko‘ra, Bishkekdagi namoyishlar chog‘ida 1218 kishi jarohat olgan, 200 nafardan ortiq odam kasalxonaga yotqizilgan.
Eslatib o‘tamiz, 5-oktabr kuni Bishkekda hukumatni qo‘llab-quvvatlovchi ikki partiya g‘olib chiqqach, parlament saylovlari natijalariga qarshi namoyishlar boshlandi. Tinch boshlangan aksiyalar kechga borib, huquq-tartibot organlari bilan to‘qnashuvlarga aylanib ketdi. Bir necha yuz kishi yaralandi, bir kishi vafot etdi.
6-oktabr tongida namoyishchilar Qirg‘iziston parlamenti va prezident ma’muriyati joylashgan binoni egalladi. Shundan so‘ng namoyishchilar Milliy xavfsizlik davlat qo‘mitasi binosiga qarab yo‘l oldi va maxsus xizmat xodimlari bilan muzokaralardan so‘ng ular sobiq prezident Almazbek Atambayevni o‘tgan yildan buyon hibsda saqlanayotgan MXDQ tergov izolyatoridan ozod qildi. Koloniyadan, shuningdek, Atambayev davrida hukumatni boshqargan sobiq bosh vazir Sapar Isakov ham ozod etildi.
Shu kuni Markaziy saylov komissiyasi parlament saylovlari natijalarini haqiqiy emas deb topdi.
Norozilik namoyishlari fonida Bishkek shahriga namoyishchilar tomonidan yangi mer tayinlandi. Ammo shaharning rasmiy rahbari Aziz Surakmatov iste’fo haqida ariza yozmadi. Prezidenti So‘ronbay Jeenbekov sodir bo‘lgan voqealarni hukumatni noqonuniy egallashga urinish deb atadi. Shuningdek, davlatning yaxlitligi, xalqning birligi va jamiyatning xotirjamligini birlamchi deb atab, muayyan sharoitlarda lavozimdan ketishga tayyorligini bildirdi.
9-oktabr kuni Qirg‘iziston prezidenti hukumat va bosh vazirni iste’foga chiqardi.
Izoh (0)