Rossiyada koronavirusga chalinish bo‘yicha yangi holatlar keskin ko‘payib ketgan bir paytda COVID-19 bemorlari uchun kasalxonalarda bo‘sh koykalar soni sezilarli tarzda qisqardi, diagnostika bo‘limlarida esa kompyuter tomografiyasi (KT)ga ko‘p soatli navbatlar hosil bo‘ldi. Bu haqda “Kommersant” gazetasi bemorlar va ularning qarindoshlariga, shuningdek, ba’zi hududlar ma’murlariga tayanib xabar bermoqda.
Moskvada va hududlarda harorati yuqori va o‘pkasi zararlangan odamlarni kasalxonaga yotqizishdan bosh tortishmoqda
Moskvada “Kommersant” xodimlaridan birining turmush o‘rtog‘ini kasalxonaga yotqizishdan bosh tortishgan, uning tana harorati 39 darajadan yuqori bo‘lgan, shuningdek, o‘pkasi qisman zararlangan (25 foizdan kamroq). Uchastka vrachi chaqiruvga bir necha kun kela olmagan, tez yordam yetib kelganidan keyin turmush o‘rtog‘i to‘rt soat KTga navbat kutgan, shifokor qabuliga kirish uchun yana bir necha soat kutgan.Moskva sog‘liqni saqlash departamentida “Kommersant”ga ma’lum qilishlaricha, “KT-markazlarga yuklama haqiqatan ham oshib bormoqda”, natijada odamlar o‘z navbatini “bir soatdan ortiq” kutib qolishi mumkin. Departamentda COVID-19 ga chalingan bemorlarni qabul qiluvchi kasalxonalar qanchalik to‘lganiga izoh berib o‘tirishmadi. 5-oktabr kuni Moskvada koronavirus infeksiyasini yuqtirib olganlar uchun ikkita zaxira gospitali ochildi, ular qariyb ikki ming kishiga mo‘ljallangan.
Orenburg viloyatida shifokorlar harorati 39 dan baland bo‘lgan va o‘pkasi ancha zararlangan Novotroisk fuqarosini kasalxonaga yotiqizshdan bosh tortishgan. Ular koykalar yetishmasligini bahona qilgan.
Magnitogorskda, shifokorlar so‘zlariga ko‘ra, KTga ko‘p soatli navbatlar yuzaga kelgan. Chelyabinskda aholi tez yordam kelishini bir necha kunlab kutib qolishayotganidan shikoyat qilgan. Shunga o‘xshash holat Stavropolda ham kuzatilmoqda, u yerda aholi tez yordamni uzoq kutmoqda, terapevtlar chaqiruvlarga kelmayapti, harorati yuqori bemorlar esa vrach qabuliga kirish uchun bir necha soatlab kutmoqda.
Yoqutistonda KT uchun tomograflar yetishmayapti, deydi mahalliy aholi. Hudud rahbari Aysen Nikolayev ma’lum qilishicha, apparatlar to‘liq band bo‘lib, aholini “bu tekshiruvdan bekordan bekorga o‘tmaslikka” chaqirdi. Yoqutiston ma’murlari navbatlar yuzaga kelmasligi uchun choralar ko‘rmoqda.
Kamida bitta hududda COVID-19 bemorlari uchun barcha koykalar tugagan, boshqa joylarda tezkorlik bilan kamaymoqda
Udmurtiya kasalxonalarida koronavirus va kasalxonadan tashqaridagi pnevmoniya bemorlari uchun barcha joylar tugagan. Bu iyulda tayyorlab qo‘yilgan ikki mingtadan ortiq joydir, deya ma’lum qilgan hudud rahbari Aleksandr Brachalov. Uning so‘zlariga ko‘ra, hududda yana mingta qo‘shimcha o‘rin yaratiladi.Rostov viloyatida kasalxonalarning to‘lishi 100 foizdan oshdi. Hudud kasalxonalarida COVID-19’ga chalingan bemorlar uchun 1774 ta koyka tayyorlangan, ammo 7-oktabr kuni klinikalarda allaqachon koronavirus yuqtirib olgan 1797 kishi yotgan edi. Zaxirada yana 890 ta joy bo‘lgan, biroq 7-oktabr kuni Rostov-Donda uchinchi koronavirus gospitali ochilgan va 400 ta koyka zaxiradan chiqarilgan.
Samara viloyatida hudud ma’murlari kasallar uchun 200 dan ortiq qo‘shimcha joy tayyorlab qo‘ygan, ammo kmoykalar deyarli tugagan, shu tufayli, viloyatda yana 400 dan ortiq qo‘shimcha o‘rin tayyorlanmoqda.
Boshqirdistonda infeksion statsionarlarda joy yetishmayapti, deya ma’lum qildi hudud rahbari Radiy Xabirov. Kasallangan odamlarni birorta ijobiy o‘zgarish kuzatilishi bilan kasalxonadan chiqarib yuborishmoqda, KTni esa soatlab kutishga to‘g‘ri kelmoqda, deydi bemorlar.
Peterburgda 4,9 mingta koykadan 858 tasi bo‘sh. Shahar ma’murlari koykalarning umumiy sonini 8,1 mingtaga ko‘paytirishni ko‘zlamoqda. “Lenekspo” ko‘rgazma zalida 12-oktabr kuni 2,5 ming bemorga mo‘ljallangan vaqtinchalik gospital ochiladi.
Yana kamida oltita hududda koronavirus yuqtirib olgan bemorlar uchun joylar deyarli tugadi. Masalan, Nijegorod viloyatida 3153 ta koykadan 345 tasi, Voronej viloyatida 3913 ta koykadan 374 tasi, Primorye o‘lkasida — 1345 tadan 236 tasi, Oltoy Respublikasida — 404 tadan 340 tasi qolgan. Magadan viloyatida infeksion kasalxonalar va bo‘limlar 60 foizga (Magadanning o‘zida — 78%), Xabarovsk o‘lkasida — 73 foizga (Xabarovskning o‘zida — 92%) to‘lgan.
Rossiyada COVID-19 ga chalinish holatlari sentabrdan boshlab o‘sib bormoqda. So‘nggi uch kun — 6, 7 va 8-oktabr kunlari mamlakatda har kuni 11 mingdan ortiq koronavirus bilan kasallanish holatlari qayd etilmoqda, bu may oyidagi maksimal ko‘rsatkichga yaqindir.
6-oktabr ma’lumotlariga ko‘ra, Rossiyaning 12 ta hududida, shu jumladan, Stavropol, Tomsk viloyati, Qrim va Udmurtiyada bir kecha-kunduzda aniqlangan kasallar soni bo‘yicha bahor — yoz boshidagi rekorddan oshib ketilgan. Bu haqda “Peterburg siyosati” fondi tadqiqotida aytiladi.
Izoh (0)