Toshkent shahrida jamoat transportlari qatnovi to‘xtatilishi munosabati bilan Toshkent viloyatidan poytaxtga qatnab ishlovchi fuqarolarga hamda ular ishlayotgan korxona, tashkilot va muassasalarga transport xizmatini tashkil etishda “Toshshahartransxizmat” aksiyadorlik jamiyati shartnoma asosida xizmat ko‘rsatadi. Bu haqda kompaniya tomonidan ma’lum qilindi.
Qayd etilishicha, yo‘lovchilar xavfsizligi hamda transport vositasining texnik va sanitariya talablari asosida xizmat ko‘rsatishini bildirish maqsadida Toshkent shahar hokimligi, “Toshshahartransxizmat” aksiyadorlik jamiyati, Yo‘l harakati xavfsizligi boshqarmasi hamkorligida maxsus belgi tayyorlandi.
Ushbu belgida transport vositasining turi hamda davlat belgisi ko‘rsatiladi va xizmat ko‘rsatuvchi korxona muhri bilan tasdiqlanadi. Bu belgi transport vositalarining texnik va sanitar holati talab darajasida ekanligi bildiradi.
“Toshshahartransxizmat” yo‘lovchilar, korxona va tashkilotlar rahbarlarini transport xizmatini tashkil etishda “Toshshahartransxizmat” tasarrufidagi faqat ana shunday belgili avtobuslardan foydalanishga chaqirgan.Eslatib o‘tamiz. Toshkent shahri hududi 24-martdan boshlab yopib qo‘yilgani, O‘zbekistonda koronavirus infeksiyasi tarqalishiga qarshi kuchaytirilgan tartib joriy etilgani, shuningdek, internet va telefon aloqasi uchun to‘lovlar kechiksa, uzib qo‘yilmasligi, mamlakatda dehqon bozorlaridan tashqari barcha bozorlarning faoliyati to‘xtatilishi haqida xabarlar berilgan. Shuningdek, O‘zbekistonda mahalliy aviaqatnovlar va respublika bo‘ylab poyezdlarda yo‘lovchi tashish to‘xtatildi.
Izoh (0)