Тошкент шаҳрида жамоат транспортлари қатнови тўхтатилиши муносабати билан Тошкент вилоятидан пойтахтга қатнаб ишловчи фуқароларга ҳамда улар ишлаётган корхона, ташкилот ва муассасаларга транспорт хизматини ташкил этишда «Тошшаҳартрансхизмат» акциядорлик жамияти шартнома асосида хизмат кўрсатади. Бу ҳақда компания томонидан маълум қилинди.
Қайд этилишича, йўловчилар хавфсизлиги ҳамда транспорт воситасининг техник ва санитария талаблари асосида хизмат кўрсатишини билдириш мақсадида Тошкент шаҳар ҳокимлиги, «Тошшаҳартрансхизмат» акциядорлик жамияти, Йўл ҳаракати хавфсизлиги бошқармаси ҳамкорлигида махсус белги тайёрланди.
Ушбу белгида транспорт воситасининг тури ҳамда давлат белгиси кўрсатилади ва хизмат кўрсатувчи корхона муҳри билан тасдиқланади. Бу белги транспорт воситаларининг техник ва санитар ҳолати талаб даражасида эканлиги билдиради.
«Тошшаҳартрансхизмат» йўловчилар, корхона ва ташкилотлар раҳбарларини транспорт хизматини ташкил этишда «Тошшаҳартрансхизмат» тасарруфидаги фақат ана шундай белгили автобуслардан фойдаланишга чақирган.Эслатиб ўтамиз. Тошкент шаҳри ҳудуди 24 мартдан бошлаб ёпиб қўйилгани, Ўзбекистонда коронавирус инфекцияси тарқалишига қарши кучайтирилган тартиб жорий этилгани, шунингдек, интернет ва телефон алоқаси учун тўловлар кечикса, узиб қўйилмаслиги, мамлакатда деҳқон бозорларидан ташқари барча бозорларнинг фаолияти тўхтатилиши ҳақида хабарлар берилган. Шунингдек, Ўзбекистонда маҳаллий авиақатновлар ва республика бўйлаб поездларда йўловчи ташиш тўхтатилди.
Изоҳ (0)