Toshkent shahrida jamoat transporti harakati to‘xtatilgani munosabati bilan aprel oyi uchun xarid qilingan oylik yo‘l chiptalari “Toshshahartransxizmat” AJning Oylik yo‘l chiptalari va jetonlar sotish bo‘limi tomonidan qaytarib olinadi hamda pul mablag‘lari fuqarolarga to‘liq miqdorda qaytariladi. Bu haqda Transport vazirligi ma’lum qildi.
Xabar berilishicha, oylik yo‘l chiptalarini xarid qilishga ulgurgan yo‘lovchilar Yunusobod tumani, Amir Temur shohko‘chasi, 6-uy manzilida joylashgan “Toshshahartransxizmat” jamiyatiga murojaat etishi yoki +99871 2335423, +99871 2441752 raqamlariga qo‘ng‘iroq qilishi mumkin.
Eslatib o‘tamiz. Toshkentda 22-martdan avtobus, metro va “marshrutka”lar harakati to‘xtatildi. Korxona va tashkilotlar tomonidan xodimlar uchun navbatchi transport vositasi qatnovi tashkil etilishi ma’lum qilindi.
Avvalroq Toshkent shahri hududi 24-martdan boshlab yopib qo‘yilgani, O‘zbekistonda koronavirus infeksiyasi tarqalishiga qarshi kuchaytirilgan tartib joriy etilgani, shuningdek, internet va telefon aloqasi uchun to‘lovlar kechiksa, uzib qo‘yilmasligi, mamlakatda dehqon bozorlaridan tashqari barcha bozorlarning faoliyati to‘xtatilishi haqida xabarlar berilgan edi. Shuningdek, O‘zbekistonda mahalliy aviaqatnovlar va respublika bo‘ylab poyezdlarda yo‘lovchi tashish to‘xtatildi.
Izoh (0)