O‘zbekistonda 24-martdan boshlab koronavirus infeksiyasi tarqalishiga qarshi kuchaytirilgan tartib joriy etilgani xabar berilgan edi. Bu haqda Vazirlar Mahkamasining tegishli qarorida belgilangan.
Unga ko‘ra, fuqarolar internet tarmog‘i va telefon aloqasi uchun to‘lovlar o‘z vaqtida amalga oshirilmagan taqdirda ham ikki oy davomida o‘chirilishiga yo‘l qo‘yilmaydi.
Biroq Spot’ning yozishicha, ayrim OAV va Telegram kanallari bu xabarni noto‘g‘ri talqin qildi. Xususan, “O‘zbekistonda internet va mobil aloqa to‘lovlaridan ikki oyga ozod etildi” degan xabarlar paydo bo‘ldi.
“O‘zbektelekom”da foydalanayotgan telekommunikatsiya xizmatlari uchun to‘lovlar hisoblanishda davom etishi, lekin internet va telefon aloqasi xizmatlari uchun to‘lovlarni o‘z vaqtida amalga oshirish imkoni mavjud bo‘lmagan abonentlar uchun xizmat ko‘rsatish to‘xtatib qo‘yilmasligi aytilgan. Kompaniya qarzdorlik yuzaga kelmasligi uchun to‘lovlarni o‘z vaqtida amalga oshirishni so‘ragan.
Ucell va Mobiuz kompaniyalari ular taqdim etadigan xizmatlar ushbu qaror doirasiga kirmasligini va to‘lovsiz xizmatlar taqdim etilmasligini ma’lum qilgan.
“Ko‘rsatilgan xizmatlar uchun barcha to‘lovlar o‘z vaqtida to‘lanishi kerak”, — deb yozilgan Mobiuz xabarida.
Eslatib o‘tamiz, Beeline, Mobiuz, Uzonline va Uzmobile o‘z abonentlariga koronavirusning tarqalishi haqida tezkor va rasmiy ma’lumotlarni olish uchun “Daryo” va boshqa saytlarga bepul kirish imkoniyatini taqdim etgandi.
Izoh (0)