Samarqanddagi maktabda elektrdagi muammo sababli o‘quvchilar qorong‘i va zax xonada dars o‘tmoqda

Ijtimoiy tarmoqlar orqali Urgut tumanidagi ayrim umumiy o‘rta ta’lim maktablarida ikkinchi smenada o‘qiyotgan o‘quvchilar chiroq yo‘qligi bois qorong‘i sinfxonalarda ta’lim olayotgani haqida ma’lumot tarqaldi.

Holatga oydinlik kiritgan Samarqand viloyati xalq ta’limi boshqarmasi matbuot xizmati xabarida aytilishicha, ayni damda mazkur tumanda 141 ta umumiy o‘rta ta’lim maktabi mavjud bo‘lib, ularda 103 239 nafar o‘quvchi tahsil olmoqda. Maktablarning aksariyati qishloqlarda joylashgan.

Urgut tumani xalq ta’limi bo‘limi qoshidagi ekspluatatsiya xizmati bosh muhandisi Akmal Xursandovning ta’kidlashicha, haqiqatan ham tumandagi umumiy o‘rta ta’lim maktablarida elektr energiyasidagi uzilishlar tez-tez uchrab turadi. Bu, ayniqsa, ikkinchi smenada o‘qiyotgan o‘quvchilarga muammo tug‘diradi.

“Afsuski, ba’zi umumiy o‘rta ta’lim maktablariga o‘rnatilgan zamonaviy isitish moslamalarining elektr energiyasi bilan ishlashini inobatga olsak, o‘quvchilarning bir paytning o‘zida ham qorong‘i, ham sovuq sinfxonada o‘tirib dars o‘tishiga to‘g‘ri keladi. Bu muammoli masalalarni kim hal qilishi joiz? O‘qituvchimi, maktab direktorimi?”, — deyilgan XTB xabarida.

Prezidentning 2018-yil 5-sentabrdagi “Xalq ta’limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonining uchinchi bandiga muvofiq, Qoraqalpog‘iston Vazirlar Kengashi raisi, viloyatlar va Toshkent shahar hokimlari xalq ta’limi muassasalarini qo‘llab-quvvatlash va ularning infratuzilmasini rivojlantirish masalasida har tomonlama ko‘maklashishi, xususan, xalq ta’limi muassasalarini elektr energiyasi, tabiiy gaz, ichimlik suvi, zarur sanitariya-gigiyena sharoitlari va boshqa kommunal xizmatlar bilan uzluksiz ta’minlashga mas’ul ekanligi qayd etilgan.

Qolaversa, viloyat hokimi Erkinjon Turdimov OAV vakillari bilan muloqot chog‘ida ba’zi maktablarda kuz-qish mavsumiga tayyorgarlik jarayonida jiddiy kamchiliklar borligini alohida tilga olib, maktab direktorlari ta’lim muassasasidagi muammolarni hal etishga emas, bevosita ta’lim samaradorligini ta’minlashga javobgar ekanligini ta’kidlagan. O‘z navbatida, ushbu masalaga ijro hokimiyati jiddiy e’tibor qaratishi lozimligini talab qilgan.

Bosh vazir Abdulla Aripov 28-noyabr, payshanba kuni aholi va ijtimoiy soha obyektlarini energoresurslar — gaz va elektr energiya bilan ta’minlashdagi muammolarga bag‘ishlangan videoselektorda “Ob-havoning keskin pasayib ketishi sababli, ushbu maktablarda o‘quvchilar sovuq xonalarda kiyim-bosh bilan ta’lim olishga majbur bo‘lmoqda. Shunday holatda ham bu sohaga mas’ul rahbarlar issiqqina xonalarida bemalol o‘tirishibdi”, — deb aytgan.