28-noyabr, payshanba kuni O‘zbekiston bosh vaziri Abdulla Aripov raisligida aholi va ijtimoiy soha obyektlarini energoresurslar — gaz va elektr energiya bilan ta’minlashdagi muammolarga bag‘ishlangan videoselektor yig‘ilishi bo‘lib o‘tgani haqida xabar berilgandi.
“Xabar.uz”ning yozishicha, yig‘ilishda O‘zbekiston Respublikasi bosh prokurori Nig‘matilla Yo‘ldoshev gaz va elektr energiya ta’minotidagi talon-torojliklar haqida axborot bergan.
Bosh prokurorning ma’lum qilishicha, joylarda gaz, elektr energiya ta’minoti masalasida muammo ko‘p. Aholini energoresurslar bilan uzluksiz ta’minlashda turli g‘irromliklar ham to‘siq bo‘lmoqda. Keyingi bir haftada 41 ta holatda 28 milliard so‘mlik tabiiy gaz talon-toroj qilingani aniqlangan. Bu borada 240 ta jinoiy ish ochilgan.
“Bu sharmandali holat. Ommaviy axborot vositalari, internet-nashrlar va ijtimoiy tarmoqlarda bu haqda aholining haqli e’tirozlari keng yoritilmoqda. Gaz va elektr energiya yetkazib beruvchilar o‘z ishlariga mas’uliyat bilan qarashmayapti. Mutasaddi rahbarlar shuncha salbiy holatlarga biron marta ommaviy axborot vositalari orqali tushuntirish yoki asosli javob bergani yo‘q”, — degan edi Abdulla Aripov O‘zbekistonning turli hududlarida kuzatilayotgan elektr ta’minotidagi uzilishlar haqida gapirib.
Izoh (0)