Самарқанддаги мактабда электрдаги муаммо сабабли ўқувчилар қоронғи ва зах хонада дарс ўтмоқда

Ижтимоий тармоқлар орқали Ургут туманидаги айрим умумий ўрта таълим мактабларида иккинчи сменада ўқиётган ўқувчилар чироқ йўқлиги боис қоронғи синфхоналарда таълим олаётгани ҳақида маълумот тарқалди.

Ҳолатга ойдинлик киритган Самарқанд вилояти халқ таълими бошқармаси матбуот хизмати хабарида айтилишича, айни дамда мазкур туманда 141 та умумий ўрта таълим мактаби мавжуд бўлиб, уларда 103 239 нафар ўқувчи таҳсил олмоқда. Мактабларнинг аксарияти қишлоқларда жойлашган.

Ургут тумани халқ таълими бўлими қошидаги эксплуатация хизмати бош муҳандиси Акмал Хурсандовнинг таъкидлашича, ҳақиқатан ҳам тумандаги умумий ўрта таълим мактабларида электр энергиясидаги узилишлар тез-тез учраб туради. Бу, айниқса, иккинчи сменада ўқиётган ўқувчиларга муаммо туғдиради.

«Афсуски, баъзи умумий ўрта таълим мактабларига ўрнатилган замонавий иситиш мосламаларининг электр энергияси билан ишлашини инобатга олсак, ўқувчиларнинг бир пайтнинг ўзида ҳам қоронғи, ҳам совуқ синфхонада ўтириб дарс ўтишига тўғри келади. Бу муаммоли масалаларни ким ҳал қилиши жоиз? Ўқитувчими, мактаб директорими?», — дейилган ХТБ хабарида.

Президентнинг 2018 йил 5 сентябрдаги «Халқ таълимини бошқариш тизимини такомиллаштириш бўйича қўшимча чора-тадбирлар тўғрисида»ги фармонининг учинчи бандига мувофиқ, Қорақалпоғистон Вазирлар Кенгаши раиси, вилоятлар ва Тошкент шаҳар ҳокимлари халқ таълими муассасаларини қўллаб-қувватлаш ва уларнинг инфратузилмасини ривожлантириш масаласида ҳар томонлама кўмаклашиши, хусусан, халқ таълими муассасаларини электр энергияси, табиий газ, ичимлик суви, зарур санитария-гигиена шароитлари ва бошқа коммунал хизматлар билан узлуксиз таъминлашга масъул эканлиги қайд этилган.

Қолаверса, вилоят ҳокими Эркинжон Турдимов ОАВ вакиллари билан мулоқот чоғида баъзи мактабларда куз-қиш мавсумига тайёргарлик жараёнида жиддий камчиликлар борлигини алоҳида тилга олиб, мактаб директорлари таълим муассасасидаги муаммоларни ҳал этишга эмас, бевосита таълим самарадорлигини таъминлашга жавобгар эканлигини таъкидлаган. Ўз навбатида, ушбу масалага ижро ҳокимияти жиддий эътибор қаратиши лозимлигини талаб қилган.

Бош вазир Абдулла Арипов 28 ноябрь, пайшанба куни аҳоли ва ижтимоий соҳа объектларини энергоресурслар — газ ва электр энергия билан таъминлашдаги муаммоларга бағишланган видеоселекторда «Об-ҳавонинг кескин пасайиб кетиши сабабли, ушбу мактабларда ўқувчилар совуқ хоналарда кийим-бош билан таълим олишга мажбур бўлмоқда. Шундай ҳолатда ҳам бу соҳага масъул раҳбарлар иссиққина хоналарида бемалол ўтиришибди», — деб айтган.