Bugun,

  • USD 11014.01
  • RUB 191.8
  • EUR 10674.78

Qashqadaryo viloyati markazi Qarshi shahridan nari borsa 2-3 kilometr uzoqlikda joylashgan “Uzunnavo” qishlog‘i aholisi gaz va suv yo‘qligidan, elektr toki kuchlanishi pastligidan nolimoqda. Bu haqda “Daryo” muxbiriga shikoyat qilgan uzunnavoliklar elektr toki kuchlanishi pastligi bois elektr choynakdagi choy 45 daqiqada qaynashini aytishmoqda.

Foto: “Daryo”

— Elektr toki kuchlanishi shu darajada pastki, elektr choynak 45 daqiqada zo‘rg‘a choy qaynatadi, — deydi Ilhom Jo‘rayev. – Ovqat elektr pechda qancha vaqtda pishishini hisoblab olavering. Bolalarimiz kechki payt dars qilolmaydi. Lampa yorug‘ligi pastligidan ko‘z toladi.

Ilhom Jo‘rayev

Ilhom Jo‘rayev
Foto: “Daryo”

Ma’lum bo‘lishicha, Qarshi tumanining mazkur qishlog‘ida yashovchi aholi 2012—2013-yillardan ushbu hududga kelib joylashgan va uy-joy qura boshlagan. Ayni paytda qishloqda 298 ta xonadon borligi aytilmoqda. Aholi soni esa 3 ming nafar kishidan oshgan. Eng yomoni qishloqda elektrlashtirish ishlari olib borilmagan. Aholi o‘z imkoniyatidan kelib chiqqan holda uyidan chiqqan yog‘ochlardan simyog‘och sifatida foydalangan. Simyog‘och yo‘q joylarda esa elektr sim tomma-tom osha o‘tkazib borilgan.

Aholi xonadonlariga tortib kelingan elektr toki simlari

Aholi xonadonlariga tortib kelingan elektr toki simlari
Foto: “Daryo”

Aholi “Daryo” muxbirining “uy-joylarni qurishdan avval yerga egalik haqida mutasaddilar qarori bo‘lganmi?”, degan savoliga javoban qaror bo‘lganini, ammo keyinchalik mazkur qarorlar soxta bo‘lib chiqqanini ta’kidlashmoqda.

Qishloqdagi simyog‘och

Qishloqdagi simyog‘och
Foto: “Daryo”

— Qaror berishgandi, ammo 2019-yil may oyida bizga uy-joy qurish uchun berilgan qarorlar noqonuniy ekanligini aytishdi va Prezident farmoniga muvofiq o‘zboshimchalik bilan qurilgan turar joylar sifatida qayta hujjatlashtirildi, — deydi Abdurauf Ibragimov. – Hozirda barcha xonadonlarning kadastr hujjatlari bor. Shunday bo‘lsa-da, elektr toki uchun simyog‘och o‘rnatishmayapti.

Foto: “Daryo”

Aholining ma’lumot berishicha, butun boshli qishloqda simyog‘ochlar deyarli yo‘q. Borlari ham aholi xonadonlaridan chiqqan talabga javob bermaydigan yog‘ochlar. Elektr toki esa aholi xonadonlari ustidan inson hayoti uchun xavfli holatda tortib keltirilgan.

Foto: “Daryo”

— Boshqa ilojimiz yo‘q, yashashimiz kerak. Yashash uchun esa elektr toki zarur, — deydi uzunnavoliklar. – Shu boisdan ham inson hayoti uchun xavfli bo‘lsa-da, tokni tomma-tom tortib kelishga majburmiz. Gaz bo‘lmasa, uyni amallab isitishimiz kerak-ku. 

Foto: “Daryo”

— Qishloqqa 2013-yil ko‘chib kelganmiz va 2019-yil mart oyiga qadar 6 yil davomida elektr tokisiz yashadik, — deydi Nazira Majidova. – Mas’ullar tokni tortib berishiga ishonchimiz qolmagach, “transformatorni o‘z pulimizga sotib oldik”, degan aholi vakillariga 250 ming so‘m to‘lab tok tortdik. U ham bo‘lsa tomma-tom tortib kelingan tok.

Abdurauf Ibragimovning ma’lum qilishicha, shu kecha-kunduzda hududda elektr toki o‘chish holati ko‘paygan.

— 4-5-noyabr kuni 36 soat “svet” bo‘lmadi, — deydi Abdurauf Ibragimov. – Qishda qor yog‘gan paytda shunday bo‘lsa nima qilamiz, bilmadim.    

Qishloq ahlining aytishicha, ayni kunda 60 ta xonadon uchun mo‘ljallangan transformatorga 120 ta xonadon ulangan. Qishloq ahli suyultirilgan gaz balloni nimaligini ham bilishmas ekan.

Foto: “Daryo”

— Elektr toki masalasida, suyultirilgan gaz balloni berilmasligi haqida murojaat qilmagan joyimiz qolmadi, — deydi Abdurauf Ibragimov. – Gaz bo‘ladi deb “truba” tortganmiz. Ammo gazdan darak yo‘q. Hech kim e’tibor bermaydi. Hatto javob ham bermaydi. Shu paytga qadar biror marta bizga suyultirilgan gaz balloni berishmagan. Gazni ko‘chadagi “zapravka”lardan sotib olamiz.

Gulchehra Rahimova

Gulchehra Rahimova
Foto: “Daryo”

— Qish keldi, uyni isitishda qiynalyapmiz, — deydi Gulchehra Rahimova. – Tok pechka qo‘shsak, tok kamligi sabab yaxshi ishlamaydi. Yosh bolamiz bilan juda qiynalyapmiz.  

Uzunnavoliklarning ma’lumot berishicha, elektr tokining tomma-tom tortib kelinishi va mavjud transformatorning 120 ta xonadonni elektr toki bilan ta’minlashga qurbi yetmayotgani haqida viloyatning sobiq rahbari Zafar Ro‘ziyev hamda ayni kundagi hokim Zoir Mirzayevga ham murojaat qilingan. Ammo har ikkala murojaat ham javobsiz qolgan. 

Aholining “Daryo” muxbiriga qo‘shimcha qilishicha, hududda yo‘l muammosi ham bor. Shuningdek, aholi xonadonlaridan chiqayotgan maishiy chiqindilarni mas’ul tashkilotlar olib ketmagani bois aholi yashovchi hudud chiqindixonaga aylantirib yuborilgan.

Foto: Nigora Majidova

— Uyimizni yoniga chiqindi to‘kib ketishadi, — deydi Nigora Majidova. – Qancha aytmaylik foydasi yo‘q. Boisi chiqindilarni tashib ketuvchi tashkilotlar bilan aholi o‘rtasida shartnoma qilinmagan. Shuning uchun ham ular bizdan umuman xabar olishmaydi. Mutasaddi tashkilotlarga murojaat qilsak-da, e’tibor qaratishmayapti.

Qishloq ahlining e’tiroziga ko‘ra, qishloqda o‘zboshimchalik bilan uy qurib olinishi natijasida yo‘l ham yopib qo‘yilgan. Oqibatda aholining yaqin yo‘li uzoqlashgan. Bu maktab o‘quvchilari uchun ham qiyinchilik tug‘dirmoqda.

Izoh
Asosiy yangiliklar
Kino
Vaqtingizga achinmaysiz: So‘nggi o‘n yillikning eng yaxshi multfilmlari (video)
Mahalliy
O‘zbekiston davlat xizmatlari sohasida qariyb 100 mingta qonunbuzilish holati aniqlandi
Mahalliy
O‘zbekistonda kuz-qish mavsumi oldidan suv tarmoqlarini sozlash ishlari qanday ketayotgani aytildi