Joriy yil 26-iyun va 9-iyul kunlari O‘zbekiston Respublikasining Germaniyadagi elchixonasi (konsullik okrugiga Chexiya ham kiradi) konsullik bo‘limi vakillari Praga shahrida vatandoshlar bilan sayyor qabullar o‘tkazdi. Bu haqda O‘zbekiston TIV ma’lum qildi.
Uchrashuvlarda 230 dan ziyod O‘zbekiston fuqarolari ishtirok etdi. Ularga konsullik hisobiga qo‘yish, bolalar uchun yo‘l hujjatlarini tayyorlash, fuqarolik holati dalolalatnomalari, vaqtincha chiqish yoki doimiy yashash ruxsatnomasini olish, fuqarolikdan chiqish tartibiga doir masalalar yuzasidan batafsil ma’lumot berildi.
Praga shahrida vafot etgan O‘zbekiston fuqarosi jasadini vatanga yuborish hujjatlarini rasmiylashtirish bilan bog‘liq masalalar hal qilindi.
Chexiyada ko‘p sonli O‘zbekiston fuqarolari va vatandoshlar yashaydi. Shu munosabat bilan ularning bir guruhi Chexiyada bolalarga o‘zbek tilini o‘rgatish, madaniy-ma’rifiy va sport tadbirlarini o‘tkazish uchun yurtdoshlarni birlashtiradigan milliy-madaniy markaz ochishga ko‘mak berishni so‘rab, murojaat qildi.
Tashabbuskorlarga tashkiliy masalalar Chexiya Respublikasining amaldagi qonunchiligiga qat’iy rioya etgan holda hal etilishi tushuntirildi. Elchixona O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi bilan hamkorlik o‘rnatishga yordam berishi bildirildi.
Izoh (0)