Жорий йил 26 июнь ва 9 июль кунлари Ўзбекистон Республикасининг Германиядаги элчихонаси (консуллик округига Чехия ҳам киради) консуллик бўлими вакиллари Прага шаҳрида ватандошлар билан сайёр қабуллар ўтказди. Бу ҳақда Ўзбекистон ТИВ маълум қилди.
Учрашувларда 230 дан зиёд Ўзбекистон фуқаролари иштирок этди. Уларга консуллик ҳисобига қўйиш, болалар учун йўл ҳужжатларини тайёрлаш, фуқаролик ҳолати далолалатномалари, вақтинча чиқиш ёки доимий яшаш рухсатномасини олиш, фуқароликдан чиқиш тартибига доир масалалар юзасидан батафсил маълумот берилди.
Прага шаҳрида вафот этган Ўзбекистон фуқароси жасадини ватанга юбориш ҳужжатларини расмийлаштириш билан боғлиқ масалалар ҳал қилинди.
Чехияда кўп сонли Ўзбекистон фуқаролари ва ватандошлар яшайди. Шу муносабат билан уларнинг бир гуруҳи Чехияда болаларга ўзбек тилини ўргатиш, маданий-маърифий ва спорт тадбирларини ўтказиш учун юртдошларни бирлаштирадиган миллий-маданий марказ очишга кўмак беришни сўраб, мурожаат қилди.
Ташаббускорларга ташкилий масалалар Чехия Республикасининг амалдаги қонунчилигига қатъий риоя этган ҳолда ҳал этилиши тушунтирилди. Элчихона Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси билан ҳамкорлик ўрнатишга ёрдам бериши билдирилди.
Изоҳ (0)