Breyvikni qamoqda saqlashga yiliga yarim million yevrodan ko‘p pul sarflanmoqda

Norvegiya prokuraturasi terrorchi Anders Breyvikni qamoqda saqlash davlatga necha pulga tushayotganini hisoblab chiqdi. Bu haqda “TASS” xabar bermoqda.

Ayblov vakili Fredrik Seyerstedning tushuntirishicha, qamoqxona terrorchini o‘ta yuqori xavfsizlik darajasida qo‘riqlashga yiliga 5 million krona (550 ming yevro) xarajat qilmoqda. Seyerstedning tushuntirishicha, bu ko‘rsatkich bilvosita xarajatlar, jumladan, tinimsiz sud eshituvlarini o‘z ichiga olmaydi.

Breyvikni saqlash rejimini tekshirish uchun maxsus komissiya tuzildi.

2016-yil 20-aprelida Breyvikning da’vosi ko‘rib chiqilib, qondirilgan edi. O‘shanda terrorchi u yomon sharoitlarda saqlanayotgani, unga sovuq qahva taklif etilayotganini, ovqatni esa mikroto‘lqinli pechda isitib berishayotganidan noligan edi. Bundan tashqari, Breyvik boshqalardan ajratib qo‘yilgani va ekstremist o‘rtoqlari bilan ko‘risha olmayotganidan norozi bo‘lgan edi.

Sud Breyvikning e’tirozlarini asosli deb topib, unga 40,7 ming dollar tovon puli to‘lash haqida qaror qabul qilgandi. Ammo qaror ikki tomonni ham qoniqtirmadi.

2011-yil 22-iyulida Breyvik ikki terakt uyushtirib, 77 kishining hayotiga zomin bo‘lgan edi.