Брейвикни қамоқда сақлашга йилига ярим миллион евродан кўп пул сарфланмоқда

Норвегия прокуратураси террорчи Андерс Брейвикни қамоқда сақлаш давлатга неча пулга тушаётганини ҳисоблаб чиқди. Бу ҳақда «ТАСС» хабар бермоқда.

Айблов вакили Фредрик Сейерстеднинг тушунтиришича, қамоқхона террорчини ўта юқори хавфсизлик даражасида қўриқлашга йилига 5 миллион крона (550 минг евро) харажат қилмоқда. Сейерстеднинг тушунтиришича, бу кўрсаткич билвосита харажатлар, жумладан, тинимсиз суд эшитувларини ўз ичига олмайди.

Брейвикни сақлаш режимини текшириш учун махсус комиссия тузилди.

2016 йил 20 апрелида Брейвикнинг даъвоси кўриб чиқилиб, қондирилган эди. Ўшанда террорчи у ёмон шароитларда сақланаётгани, унга совуқ қаҳва таклиф этилаётганини, овқатни эса микротўлқинли печда иситиб беришаётганидан нолиган эди. Бундан ташқари, Брейвик бошқалардан ажратиб қўйилгани ва экстремист ўртоқлари билан кўриша олмаётганидан норози бўлган эди.

Суд Брейвикнинг эътирозларини асосли деб топиб, унга 40,7 минг доллар товон пули тўлаш ҳақида қарор қабул қилганди. Аммо қарор икки томонни ҳам қониқтирмади.

2011 йил 22 июлида Брейвик икки теракт уюштириб, 77 кишининг ҳаётига зомин бўлган эди.