Yaponiyaning Ayti prefekturasi politsiyasi “AUM Sinrikyo” g‘oyalarining davomchilari bo‘lgan “Alef” sektasining ikki nafar a’zosini hibsga oldi. Bu haqda Yaponiyaning Kyodo agentligi xabar berdi, deb ma’lum qiladi “TASS”.
Ta’kidlanishicha, “Alef”ning ikki a’zosi 2016-yilda mamlakatdagi tintuvlar jarayonida jamoat xavfsizligi tergov boshqarmasi xodimlarining faoliyatiga to‘sqinlik qilishda shubhalanib qo‘lga olingan. “Alef”, shuningdek “Xikari no Va” nomi ostida foaliyat ko‘rsatuvchi yana bir sekta, o‘zlarining qonuniy faoliyatini davom ettirmoqda, biroq ushbu diniy tashkilotlar ularning binolarida davriy tekshiruvlar o‘tkazuvchi yapon huquqni muhofaza qilish organlarining doimiy kuzatuvi ostida turibdi.
Yaponiya hukumatining 2015-yildagi rasmiy bayonotiga ko‘ra, “AUM Sinrikyo”ning davomchilari bo‘lgan “Alef” va “Xikari no Va” tomonida ommaviy terroristik harakatlar amalga oshirilishi xavfi hanuzgacha saqlanib qolmoqda. “AUM Sinrikyo” sektasining 1995-yilda Tokio metrosiga uyushtirilgan zarin hujumi vaqtidagi a’zolari 1650 kishini tashkil qilgan.
1995-yil 20-mart kuni ertalab “AUM Sinrikyo” sektasi a’zolari Tokio metrosining beshta poyezdiga zarin gazini sepgan. Har bir qo‘poruvchida 2–3 paketdan zaharlovchi gaz bo‘lgan. Paketlarni teshib vagonlarda qoldirishgan. Hujum natijasida 13 kishi halok bo‘lgan, 6,3 mingdan ortiq kishi jabrlangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)