Buyuk Britaniya Yevroittifoqdan chiqqanidan so‘ng xalqaro maydonda, jumladan, BMTda tutgan o‘rnini yo‘qotmaydi. Bunday fikrni mamlakatning Butunjahon tashkilotidagi doimiy vakili Mettyu Raykroft bildirdi, deb yozadi “TASS”.
U Birlashgan Qirollik “diplomatik davlat” va Xavfsizlik Kengashining doimiy a’zosi bo‘lishda davom etishini ta’kidladi.
“Britaniya xalqi o‘z fikrini bildirdi. U Yevropa ittifoqini tark etishga qaror qildi, va Birlashgan Qirollik buni amalga oshiradi”, — dedi diplomat jurnalistlarga. Uning so‘zlariga ko‘ra, ushbu jarayon murakkab bo‘lib, uzoq davom etadi va mamlakat bosh vaziri yaqin oylar ichida belgilaydigan ondan boshlab ikki yil vaqt oladi.
“Ushbu vaqt davomida Birlashgan Qirollik Yevropa ittifoqining ajralmas va to‘liq a’zosi bo‘lib qoladi”, — deya qayd etdi u.
Raykroft so‘zlariga ko‘ra, ikki yillik davr o‘tib, Yevroittifoqdan chiqqanidan keyin ham “Birlashgan Qirollikning qudrati tayanchi bo‘lgan ustunlar turib beradi”.
23-iyun, payshanba kuni Buyuk Britaniyada bo‘lib o‘tgan referendumda mamlakatning Yevroittifoqdan chiqishi tarafdorlari g‘olib bo‘ldi. Britaniyaliklarning 51,9 foizi (17,41 million kishi) Birlashgan Qirollikning Yevroittifoqqa a’zoligini tugatishni yoqlab ovoz bergan bo‘lsa, 48,1 foizi (16,14 million kishi) bunga qarshi chiqdi.
Izoh (0)