Буюк Британия Евроиттифоқдан чиққанидан сўнг халқаро майдонда, жумладан, БМТда тутган ўрнини йўқотмайди. Бундай фикрни мамлакатнинг Бутунжаҳон ташкилотидаги доимий вакили Мэттью Райкрофт билдирди, деб ёзади «ТАСС».
У Бирлашган Қироллик «дипломатик давлат» ва Хавфсизлик Кенгашининг доимий аъзоси бўлишда давом этишини таъкидлади.
«Британия халқи ўз фикрини билдирди. У Европа иттифоқини тарк этишга қарор қилди, ва Бирлашган Қироллик буни амалга оширади», — деди дипломат журналистларга. Унинг сўзларига кўра, ушбу жараён мураккаб бўлиб, узоқ давом этади ва мамлакат бош вазири яқин ойлар ичида белгилайдиган ондан бошлаб икки йил вақт олади.
«Ушбу вақт давомида Бирлашган Қироллик Европа иттифоқининг ажралмас ва тўлиқ аъзоси бўлиб қолади», — дея қайд этди у.
Райкрофт сўзларига кўра, икки йиллик давр ўтиб, Евроиттифоқдан чиққанидан кейин ҳам «Бирлашган Қиролликнинг қудрати таянчи бўлган устунлар туриб беради».
23 июнь, пайшанба куни Буюк Британияда бўлиб ўтган референдумда мамлакатнинг Евроиттифоқдан чиқиши тарафдорлари ғолиб бўлди. Британияликларнинг 51,9 фоизи (17,41 миллион киши) Бирлашган Қиролликнинг Евроиттифоққа аъзолигини тугатишни ёқлаб овоз берган бўлса, 48,1 фоизи (16,14 миллион киши) бунга қарши чиқди.
Изоҳ (0)