Buyuk Britaniyaning Yevroittifoqqa a’zoligi istiqbollari haqidagi referendum natijalari ma’lum bo‘lgach, London fond birjasining asosiy FTSE 100 indeksiga kiruvchi Britaniya kompaniyalari narxi 45 milliard funtga (62 milliard dollar) tushib ketdi, deb yozadi “TASS” AP’ga tayanib.
FTSE 100 savdolar boshida 8,7 foizga pasaygan bo‘lsa, ularning so‘ngiga kelib, 3,17 foizga tushishni namoyon qildi, u 199,41 punkt yo‘qotib, 6138,69-punktga kelib qoldi. Investorlar fond bozorining bu tarzda qisqarishini Britaniya “qora juma”si deb atadi. Britaniyaning Barclays (22%), Lloyds (18%) va Royal Bank of Scotland (16%) kabi banklari pasayishda ayniqsa yetakchi bo‘ldi.
London birjasining yana bir indeksi — Buyuk Britaniya iqtisodiyoti indikatori deya baholanadigan FTSE 250 11,4 foizga pasayib, o‘z tarixidagi eng yirik qulashni namoyon etdi.
23-iyun, payshanba kuni Buyuk Britaniyada bo‘lib o‘tgan referendumda mamlakatning Yevroittifoqdan chiqishi tarafdorlari g‘olib bo‘ldi. Britaniyaliklarning 51,9 foizi (17,41 million kishi) Birlashgan Qirollikning Yevroittifoqqa a’zoligini tugatishni yoqlab ovoz bergan bo‘lsa, 48,1 foizi (16,14 million kishi) bunga qarshi chiqdi.
Izoh (0)