Yaponiya konstitutsiyasi yadro quroli qo‘llanilishini man etmasligi ma’lum qilindi

Yaponiya konstitutsiyasi mamlakatga o‘zini himoya qilish uchun yadro quroli qo‘llashni man etmaydi. Bu haqda mamlakat vazirlar mahkamasi yuridik byurosi rahbari Yusuke Yokobatake ma’lum qildi, deya xabar beradi “TASS”.

“Konstitutsiya yadro qurolining qandaydir turlari qo‘llanishini taqiqlaydi, deb o‘ylamayman. Biroq bu mamlakatimiz mudofaasi uchun minimal darajada zarur bo‘lgan vositalar bilan cheklanishi lozim. Yadro va boshqa qurol turlarining ishlatilishi ichki va xalqaro qonunchilik tomonidan qo‘yiladigan cheklovlarga ega. Aytaylik, mamlakatdan chetda harbiy kuchning qo‘llanishi umuman olganda Yaponiya mudofaasi uchun kerakli darajadan oshish sifatida qabul qilinadi”, — deya ta’kidlagan Yokobatake. 

Tokio yadro quroliga ega bo‘lmaslik, ishlab chiqarmaslik va keltirmaslik tamoyillariga tayanadi. Biroq bu tamoyillar hukumat bayonotlariga asoslangan bo‘lib, qonun kuchiga ega emas. Yaponiya yadro quroli ishlab chiqarish uchun yaroqli plutoniyning katta zaxiralariga ega.