Checheniston Respublikasi rahbari Ramzan Qodirov Makkadagi tiqilinchda yuzlab kishilar qurbon bo‘lgani bir vaqtning o‘zida ham fojia, ham “Parvardigori olam hadyasi” ekanligini aytdi, deya xabar bermoqda “Gazeta.ru”.
“Minoda ro‘y bergan hodisa — haqiqatda fojiali voqea. Biroq biz bunday deya olmaymiz, zero Saudiya Arabistoniga haj ziyoratiga boradigan har bir musulmon u yerda o‘lishni orzu qiladi. Olloh haj ziyoratini amalga oshirayotib vafot etganlarning barcha gunohlaridan kechadi. Har bir musulmon Ollohni ko‘rishni istaydi. Ya’ni bu ham fojia, ham Olloh taolodan katta sovg‘adir”, — dedi Qodirov.
Checheniston rahbari muqaddas joyda vafot etish musulmonlar uchun quvonch ekanligini ta’kidladi. “Ular juda baxtli odamlar, biz ularga havas qilamiz. Olloh nasib aylasa, ular bilan jannatda ko‘rishamiz”, — deya qo‘shib qo‘ydi Qodirov.
Avvalroq Makka yaqinidagi Mino vodiysida ziyoratchilarning to‘planib qolishi oqibatida yuzaga kelgan tiqilinch tufayli halok bo‘lganlar soni 717 kishiga yetgani, jabrlanuvchilar soni 805 nafarni tashkil etgani xabar berilgan edi.
Eslatib o‘tamiz, tiqilinch haj marosimlaridan biri — shaytonga tosh otish vaqtida ro‘y bergan. Marosim vaqtida 100 minglab odamlar bir joyga to‘planib qolgan va tartibsiz harakat qilgan.
Hozircha vafot etgan ziyoratchilarning fuqaroligiga oydinlik kiritilmadi. O‘z navbatida, O‘zbekiston Vazirlar Mahkamasi huzuridagi Din ishlari bo‘yicha qo‘mita hodisa qurbonlari va jabrlanuvchilari orasida O‘zbekiston fuqarolari yo‘qligini ma’lum qildi.
Izoh (0)