AQShning “Insonlar jonivorlar bilan shafqatli munosabatda bo‘lish tarafdori” (PETA) tashkiloti Naruto laqabli paxmoq pavianni o‘zi suratga tushirgan fotoning muallifi sifatida tan olish va bu suratdan foydalanganlik uchun kompensatsiya to‘lanishini da’vo qilib, San-Fransisko sudiga ariza berdi. Bu haqda “TASS” xabar bermoqda.
Arizada ko‘rsatilishicha, 2011-yili britaniyalik fotograf Devid Sleyter Indoneziyadagi tabiatni qo‘riqlash majmuiga maymunlarni suratga tushirish uchun boradi. Uning e’tiborsiz qoldirilgan fotoapparati bu yerda istiqomat qiladigan Narutoning qo‘liga tushib, maymun tasodifan kamera tugmasini bosib yuboradi va bir necha surat, jumladan, mashhur “selfi”ni ham olishga muvaffaq bo‘ladi.
Mazkur surat Sleyterning 2014-yilda Amerikaning Blurb noshirlik kompaniyasi tomonidan chop etilgan kitobidan o‘rin oldi. Unda suratning mualliflik huquqi fotograf va uning ish beruvchi — Buyuk Britaniyaning Wildlife Personalities kompaniyasiga tegishli ekani bildirilgan.
PETA paxmoq pavianni suratning yagona mualliflik huquqi egasi sifatida tan olish, javobgarlar — fotograf, uning kompaniyasi va nashriyotdan surat chop etilishidan tushgan daromadni maymunga to‘lab berishni talab qilmoqda. Arizada ko‘rsatilganidek, “mazkur mablag‘lar Naruto, uning oilasi va u mansub bo‘lgan maymunlar turi manfaatlari uchun ishlatilishi lozim”.
Paxmoq pavianlar faqat Indoneziyadagi Sulavesi va unga qo‘shni orollarda saqlanib qolgan, ularning soni 4—6 mingdan oshmaydi.
Izoh (0)