Xitoy prezidenti Si Szinpin mamlakat iqtisodiyotiga kiritiladigan xorijiy investitsiyalarga nisbatan ba’zi cheklovlarni bekor qilish borasida rejalar borligini tasdiqladi. “TASS” xabariga ko‘ra, Szinpin bu haqda AQShning Sietl shahrida Amerika va Xitoyning 30 ga yaqin kompaniyasi boshliqlari, xususan, Apple rahbari Tim Kuk va Berkshire Hathaway egasi Uoren Baffet bilan uchrashuv vaqtida aytib o‘tdi.
“Biz ochiqlikka asoslangan yangi iqtisodiy tizimni qurish, xorijiy investitsiyalar sohasida yangi islohotlar (qoidalar)ni ishga tushirish va chet el investitsiyalariga nisbatan cheklovlarni keskin kamaytirish ustida ishlayapmiz”, — deya qayd etdi Si Szinpin. Bu kabi yumshatishlar dastlab AQShning ikki avtogiganti — General Motors va Ford’ga ta’sir qiladi. “GM va Ford Xitoydagi investitsiyalari hajmini oshirishi mumkin”, — dedi Xitoy davlat rahbari.
Ma’lumot uchun, Xitoy raisi Si Szinpin AQShga tashrifini mamlakatning g‘arbiy sohilidan boshladi. U Amerika biznesi yetakchilari bilan uchrashib, Sietlda Amerika—Xitoy munosabatlari bo‘yicha milliy qo‘mita va Amerika—Xitoy ishbilarmon kengashi tomonidan tashkil etilgan tantanali qabulda dasturiy ma’ruza bilan chiqish qildi.
24-sentabr kuni Szinpin AQSh g‘arbidagi safarini yakunlab, Vashingtonga yo‘l oladi. Tashrifning ishchi qismi 25-sentabr, juma kuniga belgilangan bo‘lib, uning doirasida Oq uyda uchrashuv marosimi, muzokaralar va AQSh prezidenti Barak Obama bilan birga matbuot anjumani bo‘lib o‘tadi.
Izoh (0)