Nyu-Yorkdagi Turing Pharmaceuticals farmatsevtika kompaniyasi avgust oyida AQShda ommalashgan bir qator dori vositalarini ishlab chiqarish huquqini sotib olgandi. Meduza xabariga ko‘ra, ular orasida parazitar infeksiyani davolashda ishlatiladigan daraprim dorisi ham bor edi.
Daraprim 1950-yillardan beri toksoplazmoz kasalligini davolashda ishlatiladigan preparat bo‘lib, Jahon sog‘liqni saqlash tashkilotining asosiy dori vositalari ro‘yxatiga kiritilgan. Ba’zi ma’lumotlarga ko‘ra, sayyora aholisining 50 foizi toksoplazmoz bilan zararlangan, u immun tizimi kasallangan odamlar uchun ayniqsa xavfli. Shu sababli ham AQShda daraprim OIV bilan kasallanganlarga tavsiya etiladigan standart preparatlardan biri edi.
Turing Pharmaceuticals daraprimni sotib olganidan so‘ng, dorixonalarda uning bir tabletkasi narxi 18 dollardan 750 dollargacha ko‘tarilib ketdi (narx o‘sishi 4166 foizga teng bo‘ldi; dastlab OAV dorining eski — 13,5 dollarlik narxidan kelib chiqib, bir tabletka 5500 foizga qimmatlashgani haqida yozgandi, biroq Turing Pharmaceuticals rahbari Martin Shkrelining vakillari OAVning hisob-kitobdagi xatosini ko‘rsatib berdi).
OITS bilan kasallanganlarning manfaatlarini himoya qiluvchi jamoat tashkiloti — HIV Medicine Association assotsiatsiyasi hisob-kitoblariga ko‘ra, tibbiy sug‘urta bo‘lgan taqdirda ham bir dona daraprim tabletkasi hozirgi narx-navoda bemor uchun kamida 150 dollarga tushadi. Biroq, The Washington Post’ning yozishicha, mazkur preparat bilan davolanish xarajatlari tibbiy sug‘urta bilan qoplanmaydi.
Narxning keskin o‘sishi ijtimoiy tarmoqlarda faol norozilikka va bahs-munozaralarga sabab bo‘ldi. Xususan, Reddit foydalanuvchilari Turing Pharmaceuticals’ning barcha mahsulotlarini boykot qilishni taklif qilishdi. Biroq ba’zi foydalanuvchilar bunday yondashuv samarasiz ekanligini ham aytib o‘tdi: ichmasang, o‘ladigan doringni boykot qilish biroz murakkab jarayon.
Biroz vaqt o‘tib Martin Shkreliga AQSh siyosiy mashinasi ham tashlandi. Senat Turing Pharmaceuticals’ni avvalroq boshlangan mojaro — dori vositalari bozoridagi narxlarning o‘sishi bo‘yicha tergovga jalb etdi, AQSh prezidentligiga nomzod Hillari Klinton esa bunday harakatlarga nisbatan qarshi kurash bo‘yicha o‘z rejasini zudlik bilan taqdim etishini bildirdi.
https://twitter.com/HillaryClinton/status/645974772275408896
“Martin Shkrelini na jamoatchilikning g‘azab va shikoyatlarga to‘la maktublari, na jurnalistlarning da’volari, na siyosatchilarning tahdidlari tashvishga solmoqda. Turing Pharmaceuticals vakillarining izohlashicha, ular narxi qimmatlagan dori vositalaridan tushgan daromadni toksoplazmozni chuqur o‘rganishga, shuningdek, aholini mazkur kasallik xavflaridan ogohlantirishga yo‘naltirmoqchi”, — deb yozadi Meduza.
Izoh (0)