Yevropa Ittifoqi mamlakatlari yetakchilari suriyalik qochoqlarga ular Yevroittifoq chegarasiga yetib kelguniga qadar yordam ko‘rsatish haqida kelishib oldi. Bu haqda “Vedomosti” xabar bermoqda.
Migratsiya inqirozi masalasida 24-sentabrga o‘tar kechasi yakuniga yetgan Yevropa Ittifoqi sammitida mazkur maqsadlar uchun qo‘shimcha 1 milliard yevro ajratish va BMTning Qochoqlar ishlari bo‘yicha oliy komissari boshqarmasining Jahon oziq-ovqat dasturi doirasida eng avvalo Livan, Iordaniya va Turkiyaga taqsimlab berish haqida kelishib olindi.
Yevroittifoq yetakchilarining fikricha, “qochoqlar va muhojirlarning eng katta to‘lqini hali oldinda”. Yevropa Kengashi rahbari Donald Tuskning so‘zlariga ko‘ra, Suriyani 8 million kishi tashlab chiqishga majbur bo‘ldi va ularning aksariyati qo‘shni mamlakatlardan qo‘nim topgan. Sammitning yakuniy bayonotida 12 million ehtimoliy qochoq haqida so‘z boradi.
Shuningdek, Yevropa Ittifoqi muhojirlar bilan bog‘liq joriy muammolarni hal qilish uchun Turkiyaga 1 milliard, Serbiya va Makedoniya uchun 17 million yevro safarbar etishga tayyor ekanligini ma’lum qilgan.
Izoh (0)