Чеченистон Республикаси раҳбари Рамзан Қодиров Маккадаги тиқилинчда юзлаб кишилар қурбон бўлгани бир вақтнинг ўзида ҳам фожиа, ҳам «Парвардигори олам ҳадяси» эканлигини айтди, дея хабар бермоқда «Газета.ru».
«Минода рўй берган ҳодиса — ҳақиқатда фожиали воқеа. Бироқ биз бундай дея олмаймиз, зеро Саудия Арабистонига ҳаж зиёратига борадиган ҳар бир мусулмон у ерда ўлишни орзу қилади. Оллоҳ ҳаж зиёратини амалга ошираётиб вафот этганларнинг барча гуноҳларидан кечади. Ҳар бир мусулмон Оллоҳни кўришни истайди. Яъни бу ҳам фожиа, ҳам Оллоҳ таолодан катта совғадир», — деди Қодиров.
Чеченистон раҳбари муқаддас жойда вафот этиш мусулмонлар учун қувонч эканлигини таъкидлади. «Улар жуда бахтли одамлар, биз уларга ҳавас қиламиз. Оллоҳ насиб айласа, улар билан жаннатда кўришамиз», — дея қўшиб қўйди Қодиров.
Аввалроқ Макка яқинидаги Мино водийсида зиёратчиларнинг тўпланиб қолиши оқибатида юзага келган тиқилинч туфайли ҳалок бўлганлар сони 717 кишига етгани, жабрланувчилар сони 805 нафарни ташкил этгани хабар берилган эди.
Эслатиб ўтамиз, тиқилинч ҳаж маросимларидан бири — шайтонга тош отиш вақтида рўй берган. Маросим вақтида 100 минглаб одамлар бир жойга тўпланиб қолган ва тартибсиз ҳаракат қилган.
Ҳозирча вафот этган зиёратчиларнинг фуқаролигига ойдинлик киритилмади. Ўз навбатида, Ўзбекистон Вазирлар Маҳкамаси ҳузуридаги Дин ишлари бўйича қўмита ҳодиса қурбонлари ва жабрланувчилари орасида Ўзбекистон фуқаролари йўқлигини маълум қилди.
Изоҳ (0)