Ozarbayjon poytaxti Boku shahrining Binagadinskiy tumanidagi ko‘p qavatli uylardan birida sodir bo‘lgan yong‘in yuzasidan ayblanayotgan yana 4 kishi qo‘lga olindi. Ular 4 oy hibsda saqlanadi, deb xabar qiladi “Trend.az”.
Ayblanuvchilar orasida qoplamalar ishlab chiqaruvchi Global Stone kompaniyasi bosh direktori Ugur Bashirov, Global Construction rahbari o‘rinbosari Alekper Askerov, Binagadinskiy tumani xo‘jalik bo‘limi sobiq boshlig‘i Adolat Rajabov, 2012—2013-yillarda tumanning Uy-joy kommunal xo‘jalik birlashmasida boshliq lavozimida ishlagan Nizami Orujevlar bor.
Eslatib o‘tamiz, oldinroq Global Construction kompaniyasi rahbari Miryusuf Mahmudov 19-may kuni yong‘in yuzaga kelgan uyning qoplamalarida sifatsiz materiallardan foydalanganlik aybi bilan 4 oyga hibsga olingandi. Endilikda yong‘in ishi bo‘yicha qo‘lga olinganlar 5 kishini tashkil etmoqda. Ularga yong‘in xavfsizlik qoidalarini buzish va o‘z mansabini suiiste’mol qilish ayblari qo‘yildi.
19-may kuni yuzaga kelgan yong‘in natijasida 15 kishi hayotdan ko‘z yumdi va 56 kishi jabrlandi.
Avvalroq, Ozarbayjon FVV rahbari Kamoliddin Geydarov yong‘in tufayli O‘zbekistonga ishchi tashrifini erta yakunlaganini xabar qilgandik.
Izoh (0)