Isroil hukumati davlat budjetini ko‘paytirish maqsadida 9 milliard dollar (31 milliard shekel) ajratishga qaror qildi. Bu haqda The Times of Israel xabar bermoqda.

Ma’lum qilinishicha, ushbu mablag‘ning 473 million dollari (1,6 milliard shekel) G‘azo sektoriga gumanitar yordam ko‘rsatish uchun sarflanadi.
Xarajatlar o‘sishining asosiy qismi mudofaaga yo‘naltiriladi va Mudofaa vazirligi byudjetidan tashqari barcha vazirliklar byudjetlari 3,35 foizga qisqartiriladi. Qisqartirishlar yangi yil boshidan kuchga kiradi.
Bunday qaror mamlakat milliy xavfsizlik vaziri Itamar Ben-Gvir va ta’lim vaziri Yoav Kishning e’tiroziga sabab bo‘lgan. Ular kelgusi o‘quv yilida ta’lim muassasalarida xavfsizlik choralarini moliyalashtirish uchun mablag‘ ajratilmasa, buni qo‘llab-quvvatlamasliklarini bildirdilar.
Hukumat tarkibidan chiqqan ultra ortodoksal Knesset partiyalari ham byudjetdagi o‘zgarishlarga qarshi chiqmoqda.
G‘azoda qariyb 2 yildan beri davom etayotgan urush oqibatida halok bo‘lgan falastinliklar soni 62 mingdan oshdi. Sektorda Isroilning uzluksiz bombardimoni, ocharchilik va oziq-ovqat izlab chiqqan tinch aholining o‘ldirilishi davom etmoqda.
Bundan avval Isroil harbiy razvedkasi boshqarmasining sobiq generali Aharon Halivaning maxfiy audioyozuvlari Isroilning Channel 12 telekanali tomonidan internetga sizdirildi. Unda general G‘azoda halok bo‘layotgan o‘n minglab falastinliklarning o‘limini “kelajak avlodlar uchun zarur va muhim” deb aytadi.
Shu kunlarda Qatar va Misr vositachiligida 60 kunlik sulh taklifi ilgari surilmoqda. HAMAS manbalari esa 19-avgust uni ma’qullaganini bildirdi. Kelishuvga ko‘ra, Isroilda saqlanayotgan ayrim falastinliklar hamda G‘azoda tutqunlikda bo‘lgan isroilliklarning yarmi ozod qilinishi mumkin.
Izoh (0)