Buyuk Britaniyada Devid Kemeronning bosh vazir etib qayta saylanishiga qarshi norozilik namoyishlari bo‘lib o‘tdi

London shahri markazida Devid Kemeronning Buyuk Britaniya bosh vaziri etib qayta saylanishiga qarshi norozilik namoyishlari bo‘lib o‘tdi. Echo.msk.ru’ning xabar berishicha, tartibsizliklarga aylanib ketgan namoyishning 17 ishtirokchisi hibsga olingan.

Dauning-stringdagi bosh vazir qarorgohidan uncha uzoq bo‘lmagan joyda bo‘lib o‘tgan namoyishda bir necha yuz kishi ishtirok etgan. “Hokimiyat – xalqqa” kabi shior va chaqiriqlar bilan ko‘chaga chiqqan yoshlar politsiyachilarga qarata turli buyumlarni, hatto, velosipedni uloqtirishgan.

Namoyishda ishtirok etgan bezorilar Ikkinchi jahon urushida ishtirok etgan ayollarga bag‘ishlangan yodgorlikka ham hujum qilishgan. Tartibsizliklar natijasida besh nafar politsiyachi tan jarohati olgan, namoyishchilardan esa hech kim jabrlanmagan.

Qayd etishlaricha, Buyuk Britaniyaning boshqa shaharlarida ham Londondagi kabi hukumatga qarshi norozilik namoyishlari bo‘lib o‘tgan.