Germanwings aviakompaniyasining A320 layneri uchuvchisi Andreas Lyubits fojeaga bir yarim daqiqa qolganida samolyotni yana balandlikka ko‘tarishga uringan. Bu haqda samolyot qora qutilari ma’lumot berdi, deya xabar bermoqda Bild gazetasi.
Gazeta ma’lumotlariga ko‘ra, Fransiyaning BEA aviatsiya idorasi aviahalokat yuzasidan 29 sahifali hisobot chiqargan bo‘lib, unda samolyot qora qutisidan olingan ma’lumotlar tahlil qilingan.
Hujjatda qayd etilishicha, samolyot yer bilan qulashiga bir yarim daqiqa qolganida shturvalga ta’sir ko‘rsatilgan – uchuvchi samolyotni balandlikka ko‘tarishga uringan, biroq richagni juda kuchsiz bosgan va avtopilot o‘chmagan.
Shunday qilib, Bild’ning xulosasiga ko‘ra, yerga to‘qnashish arafasida uchuvchi vahimaga tushib qolgan va fojeaning oldini olishga uringan.
Avvalroq Deutsche Welle Andreas Lyubits o‘zining so‘nggi reysi arafasida samolyotni pastlatishga urinib ko‘rgani ma’lum bo‘lgani haqida xabar bergandi. Halokatga uchragan samolyot qora qutilari ma’lumotiga ko‘ra, samolyot Dyusseldorfdan Barselonaga uchayotgannida pastlagan.
Bild’ning Fransiya maxsus xizmatlaridagi manbalari ma’lum qilishicha, bunda samolyot bir necha daqiqa davomida “nazorat qilib turilgan holda, uchish-texnik nuqtai nazardan oqlab bo‘lmaydigan pastlashni” amalga oshirgan. Tabloid bu aviahalokat oldidan amalga oshirilgan repititsiya bo‘lishi mumkinligini inkor etmagan.
Germanwings aviakompaniyasining Ispaniyadan Germaniyaga uchib ketayotgan A320 samolyoti 24-mart kuni Fransiya janubidagi tog‘li hududda halokatga uchragandi. Uning bortida bo‘lgan barcha – 144 yo‘lovchi va ekipajning olti a’zosi halok bo‘lgan.
Izoh (0)