Germanwings авиакомпаниясининг А320 лайнери учувчиси Андреас Любиц фожеага бир ярим дақиқа қолганида самолётни яна баландликка кўтаришга уринган. Бу ҳақда самолёт қора қутилари маълумот берди, дея хабар бермоқда Bild газетаси.
Газета маълумотларига кўра, Франциянинг BEA авиация идораси авиаҳалокат юзасидан 29 саҳифали ҳисобот чиқарган бўлиб, унда самолёт қора қутисидан олинган маълумотлар таҳлил қилинган.
Ҳужжатда қайд этилишича, самолёт ер билан қулашига бир ярим дақиқа қолганида штурвалга таъсир кўрсатилган – учувчи самолётни баландликка кўтаришга уринган, бироқ ричагни жуда кучсиз босган ва автопилот ўчмаган.
Шундай қилиб, Bild’нинг хулосасига кўра, ерга тўқнашиш арафасида учувчи ваҳимага тушиб қолган ва фожеанинг олдини олишга уринган.
Аввалроқ Deutsche Welle Андреас Любиц ўзининг сўнгги рейси арафасида самолётни пастлатишга уриниб кўргани маълум бўлгани ҳақида хабар берганди. Ҳалокатга учраган самолёт қора қутилари маълумотига кўра, самолёт Дюссельдорфдан Барселонага учаётганнида пастлаган.
Bild’нинг Франция махсус хизматларидаги манбалари маълум қилишича, бунда самолёт бир неча дақиқа давомида «назорат қилиб турилган ҳолда, учиш-техник нуқтаи назардан оқлаб бўлмайдиган пастлашни» амалга оширган. Таблоид бу авиаҳалокат олдидан амалга оширилган репитиция бўлиши мумкинлигини инкор этмаган.
Germanwings авиакомпаниясининг Испаниядан Германияга учиб кетаётган А320 самолёти 24 март куни Франция жанубидаги тоғли ҳудудда ҳалокатга учраганди. Унинг бортида бўлган барча – 144 йўловчи ва экипажнинг олти аъзоси ҳалок бўлган.
Изоҳ (0)