Tarixda ilk bor ayol kishi AQSH flotlaridan biriga rahbarlik qilishi mumkin

AQSH harbiy-dengiz kuchlarining tezkor flotlaridan biriga tarixda ilk bor ayol kishi qo‘mondonlik qilishi mumkin. Bu haqda Navy Times xabar bermoqda.

AQSH prezidenti Barak Obama vitse-admiral Nora Taysonni 3-(Tinch okeani) tezkor flot qo‘mondonligiga nomzod sifatida Senat muhokamasiga kiritdi. Tayson hozirgi vaqtda AQSH floti qo‘mondonlik kuchlari (USFLTFORCOM, sobiq AQSH Atlantika floti) rahbari o‘rinbosari lavozimini ishlamoqda.

AQSH harbiy-dengiz kuchlarida ayollar bir necha bor admirallik unvonini olishgan hamda yuqori darajadagi qo‘mondonlik va shtab lavozimlarini egallashgan, biroq tezkor flotlarni boshqarishni shu vaqtgacha ularga ishonib topshirishmagandi.

Ayollarning flotdagi eng yuqori natijasini Mishel Govard qayd etgan – 2014-yil iyulida to‘liq admiral unvonini olgan bu ayol AQSH harbiy-dengiz kuchlari shtabi boshlig‘i birinchi o‘rinbosari etib tayinlangandi. Vitse-admiral Jan Tige esa AQSH harbiy-dengiz kuchlari kiberoperatsiyalar qo‘mondonligi – “10-flot” rahbari etib tayinlangan.

Nora Tayson 1983-yildan beri flotda xizmat qiladi. Dengiz aviatsiyasining sohilbo‘yi qismlarida, keyinroq “Enterprayz” va “Leksington” aviatashuvchi kemalari bortida xizmat qilgan. 2004-yildan “Bataan” universal desant kemasini boshqargan. 2007-yili esa 7-tezkor flot ta’minoti rahbari etib tayinlangan. 2010-yili “Jorj Bush” aviatashuvchi kemasi atrofida harakatlanuvchi 2-aviatashuvchi zarbdor guruh rahbariga aylangan.