АҚШ ҳарбий-денгиз кучларининг тезкор флотларидан бирига тарихда илк бор аёл киши қўмондонлик қилиши мумкин. Бу ҳақда Navy Times хабар бермоқда.
АҚШ президенти Барак Обама вице-адмирал Нора Тайсонни 3-(Тинч океани) тезкор флот қўмондонлигига номзод сифатида Сенат муҳокамасига киритди. Тайсон ҳозирги вақтда АҚШ флоти қўмондонлик кучлари (USFLTFORCOM, собиқ АҚШ Атлантика флоти) раҳбари ўринбосари лавозимини ишламоқда.
АҚШ ҳарбий-денгиз кучларида аёллар бир неча бор адмираллик унвонини олишган ҳамда юқори даражадаги қўмондонлик ва штаб лавозимларини эгаллашган, бироқ тезкор флотларни бошқаришни шу вақтгача уларга ишониб топширишмаганди.
Аёлларнинг флотдаги энг юқори натижасини Мишель Говард қайд этган – 2014 йил июлида тўлиқ адмирал унвонини олган бу аёл АҚШ ҳарбий-денгиз кучлари штаби бошлиғи биринчи ўринбосари этиб тайинланганди. Вице-адмирал Жан Тиге эса АҚШ ҳарбий-денгиз кучлари кибероперациялар қўмондонлиги – «10-флот» раҳбари этиб тайинланган.
Нора Тайсон 1983 йилдан бери флотда хизмат қилади. Денгиз авиациясининг соҳилбўйи қисмларида, кейинроқ «Энтерпрайз» ва «Лексингтон» авиаташувчи кемалари бортида хизмат қилган. 2004 йилдан «Bataan» универсал десант кемасини бошқарган. 2007 йили эса 7-тезкор флот таъминоти раҳбари этиб тайинланган. 2010 йили «Жорж Буш» авиаташувчи кемаси атрофида ҳаракатланувчи 2-авиаташувчи зарбдор гуруҳ раҳбарига айланган.
Изоҳ (0)