30-avgustdan e’tiboran, O‘zbekiston terma jamoasi Mirjalol Qosimov bosh murabbiyligida poytaxtimizdagi “Jar” stadionida o‘quv-mashg‘ulot yig‘inini o‘tkazmoqda, deb yozadi Uff.uz.
Yig‘inning ikkinchi kuni terma jamoamiz “Paxtakor” klubi bilan o‘rtoqlik uchrashuvida 2:2 hisobini qayd etishdi.
E’tiborlisi, o‘yindagi barcha gollar “paxtakorchilar” tomonidan kiritildi. Terma jamoa safida Igor Sergeyev va Vladimir Kozak o‘zlarini ko‘rsatgan bo‘lsa, “Paxtakor” tarkibida Bahodir Pardayev va Anvar Soliyev gollarga mualliflik qildi.
Nashrning eslatishicha, 4 sentabr kuni “Paxtakor” markaziy stadionida Iordaniya milliy terma jamoasiga qarshi o‘tkaziladigan o‘rtoqlik uchrashuvida Osiyo o‘yinlariga yo‘l oladigan futbolchilarimiz maydonga tushadi.
Terma jamoa bosh murabbiyi Mirjalol Qosimovning InterFutbol nashriga xabar berishicha, hozircha yig‘inda quyidagi futbolchilar ishtirok etyapti.
Darvozabonlar:Eldor Suyunov (“Nasaf”), Nikita Ribkin (“Paxtakor”)
Himoyachilar:Yegor Krimets, Davron Hoshimov (ikkisi “Paxtakor”), Bobur Yo‘ldoshev, Islom To‘xtaxo‘jayev, Salim Mustafoyev (hammasi “Lokomotiv”), Sherzod Fayziyev (“Mash’al”), Azamat Isroilov (“Olmaliq”).
Yarim himoyachilar:Akbar Ismatullayev, Vladimir Kozak, Jamshid Iskandarov (hammasi “Paxtakor”), Azimjon Ahmedov (“Navbahor”), Fozil Musayev (“Lokomotiv”), Dilshod Jo‘rayev, Sardor Rashidov (ikkisi ham “Bunyodkor”), Farrux Sayfiyev (“Nasaf”).
Hujumchilar:Igor Sergeyev (“Paxtakor”), Farhod Tojiyev (“Lokomotiv”), Shahzodbek Nurmatov (“Metallurg”), Navro‘zbek Alimov (“Qizilqum”).
Tizzasidagi jarohat sabab “Neftchi” hujumchisi Pavel Smolyachenko terma jamoa lagerini tark etib, o‘z klubi ixtiyoriga qaytib ketdi. Legionerlardan esa Server Jeparov, Temur Kapadze va Aziz Haydarov Toshkentga yetib kelishdi.
Bugun tunda Odil Ahmedov, Sanjar Tursunov hamda Vitaliy Denisovning kelishi kutilyapti. Xitoyning “Changchun Yatai” klubida to‘p tepib kelayotgan himoyachi Anzur Ismoilov esa ertaga terma jamoa safini to‘ldiradi.
8-sentabr kuni Yangi Zelandiyaga qarshi o‘tkaziladigan uchrashuvda asosiy va shu bilan birga bugungi kundagi eng kuchli tarkib maydonga tushadi. Bo‘lajak o‘yinda “Lokomotiv”dan Ignatiy Nesterov, Jasur Hasanov (kattasi) va Shavkat Mullajonovning ham maydonga tushishi kutilyapti.
Izoh (0)