Ukraina prezidenti Vladimir Zelenskiyning 28-fevral kuni Oq uyga tashrifida yuzaga kelgan mojaro bosim o‘tkazish strategiyasining bir qismi edi. Bu haqda AQSH prezidenti Donald Tramp 17-mart kuni Kennedi markazida jurnalistlar oldida so‘zlagan nutqida aytib o‘tdi.
Biz Ukrainani to‘g‘ri yo‘lga yo‘naltirishimiz kerak edi. Bu oddiy vaziyat emas edi. Siz Oval kabinetdagi kichik sahnani ko‘rdingiz, ammo hozir ular to‘g‘ri yo‘ldan ketmoqda deb o‘ylayman. Biz tinchlik kelishuviga erishish, o‘t ochishni to‘xtatish, keyin esa tinchlik bitimiga erishish uchun harakat qilmoqdamiz, dedi AQSH prezidenti jurnalistlar bilan suhbatda.
Tramp Ukrainadagi urushda ko‘plab odamlar halok bo‘layotganini qo‘shimcha qilib, barchasini to‘g‘ri qilganiga ishonch bildirdi. Bundan tashqari, u Ukrainaga qurol-yarog‘ va razvedka ma’lumotlarini yetkazib berishni to‘xtatish haqidagi savolga javob berar ekan, bu qaror Rossiyaning Kursk viloyatidagi Ukraina armiyasi uchun hech qanday oqibatlarga olib kelmaganini aytdi.
Yo‘q, yo‘q, aslo unday emas. Agar men ko‘plab o‘limlarga sabab bo‘ladigan yomon ish qilayotgan birovni ko‘rsam, aralashishimning yagona sababi insonparvarlikdir. Men insoniylik uchun aralashyapman, chunki u yerda ko‘p odamlar halok bo‘lmoqda, dedi u.
Prezidentlar o‘rtasidagi janjal 28-fevral kuni sodir bo‘ldi. Zelenskiy Vladimir Putin bilan diplomatik munosabatlar o‘rnatishga qarshi chiqib, o‘z pozitsiyasini Moskva ilgari erishilgan kelishuvlarni bir necha bor buzgani bilan asosladi.
Bunga javoban Tramp va AQSH vitse-prezidenti Vens Zelenskiyni tanqid qilib, uni urushni davom ettirish istagi va Amerika tomoniga hurmatsizlikda aybladi. Oxir-oqibat, uchrashuv bahsga aylanib ketdi va Zelenskiy foydali qazilmalar bo‘yicha bitimni imzolamasdan Oq uyni muddatidan oldin tark etdi. Voqeadan so‘ng Tramp ma’muriyati Ukrainaga harbiy yordamni to‘xtatishini e’lon qildi. Zelenskiy AQSH prezidentidan Oq uyda yuz bergan bahs uchun uzr so‘radi.
Izoh (0)